Рөстәм Миңнеханов "Annual Investment Meeting" инвестицион форумы кысаларында БГӘ икътисад министры белән очрашты

Бүген Татарстан Республикасы Президенты вазыйфаларын вакытлыча башкаручы Рөстәм Миңнеханов Берләшкән Гарәп Әмирлекләре (БГӘ) икътисад министры Солтан Әл- Мансури белән очрашты. Очрашу бу көннәрдә Дубай шәһәрендә уздырыла торган "Annual Investment Meeting" инвестицион форумы (AIM-2015) кысаларында оештырылды. Очрашуда шулай ук БГӘдә Россия Федерациясенең Гадәттән тыш һәм Тулы вәкаләтле Илчесе Александр Ефимов, Татарстан Республикасының Дубай шәһәрендәге сәүдә-икътисадый вәкиле Тимур Хәйретдинов, Татарстан Республикасы Инвестицион үсеш агентлыгы җитәкчесе Талия Миңнуллина, Татарстан Республикасы яшьләр эшләре һәм спорт министры Владимир Леонов, Татарстан Республикасының Туризм буенча дәүләт комитеты рәисе Сергей Иванов һәм башкалар катнашты.

Рөстәм Миңнеханов Солтан Бин Сәед Әл-Мансурига кунакчыллыклары һәм инвесторлар өчен эчтәлекле һәм файдалы форум өчен рәхмәт белдерде. Безнең Әмирлекләр белән хезмәттәшлек өчен мөмкинлекләр күп, безнең мөнәсәбәтләр киңәя бара, диде.

Рөстәм Миңнеханов сүзләренчә, Татарстан Россиядә БГӘ үзенең кызыклы проектларын инвестицияләү өчен идеаль урын булырга мөмкин.

Татарстан Республикасы Президенты вазыйфаларын вакытлыча башкаручы ассызыклаганча, Татарстан белән БГӘ арасында хезмәттәшлек тәҗрибәсе бар. Татарстан белән Әмирлекләр арасында хезмәттәшлекнең түбәндәге юнәлешләре булырга мөмкин: ислам финанславын җәлеп итү, «КАМАЗ» ААҖ автомобильләрен һәм Татарстанда җитештерелгән вертолетлар китерүне, шулай ук күргәзмә эшчәнлеген киңәйтү. Р.Миңнеханов сүзләренчә, уртак проектлар икътисадның төрле өлкәләрендә булдырылырга мөмкин.

БГӘнең икътисад министры Солтан Бин Сәед Әл-Мансури үз чиратында белдергәнчә, былтыр ул барып күргән барлык илләрдән, Россиянең бер төбәге буларак Татарстан аңарда күркәм һәм тирән хисләр калдырды. «Сез традицияләр белән заманчалык арасында баланс таба алгансыз, - диде ул. – Барлык эшләрнең уңышлы баруы төрле мәдәниятләр, диннәр һәм халыклар арасында тату һәм тыныч яшәү рәвешен аңлауга нигезләнә».

Сөйләшүләр барышында яклар хезмәттәшлек перспективаларын югары бәяләделәр. Рөстәм Миңнеханов Солтан Бин Сәед Әл-Мансурины Казанда 15-16 июньдә булачак "KazanSummit-2015" халыкара инвестицион форумына чакырды.

Аннары AIM-2015 инвестицион форумы кысаларында Рөстәм Миңнеханов Марокконың җайланмалар белән тәэмин итү, транспорт һәм логистика министры Азиз Рабах һәм Катар Икътисад һәм коммерция министры Шәех Әхмәд Бен Җассим Бин Мөхәммәд Әл-Тани белән очрашты.

Моннан тыш, Татарстан Республикасы Президенты вазыйфаларын вакытлыча башкаручы Рөстәм Миңнеханов һәм Хосусый секторны үстерү ислам корпорациясе генераль директоры Халед Мөхәммәд Әл-Абуди киләчәктә үзара файдалы хезмәттәшлек турында фикер алыштылар. Россиянең һәм, аның бер субъекты буларак, Татарстанның ислам дөньясы белән мөнәсәбәтләре динамик рәвештә үсә, дип билгеләп үтте Рөстәм Миңнеханов. Ул шулай ук искәрткәнчә, ислам финанславы һәм банкинг Татарстан өчен перспектив һәм кызыклы булырга мөмкин. Халед Мөхәммәд Әл-Абуди хосусый секторны үстерү ислам корпорациясе белән хезмәттәшлекне активлаштыру фикерен хуплады, дип хәбәр итә ТР Президенты матбугат хезмәте.