2015 елда КЛИППЕР Инженер бизнесының Халыкара җәйге лагере Татарстан Республикасында оештырылачак

2015 елның 16 мартында Икътисад министрлыгында Өченче КЛИППЕР Инженер бизнесының Халыкара җәйге лагере 2015не оештыру һәм үткәрү мәсьәләләренә багышланган киңәшмә үтте.
Быел Инженер бизнесының җәйге мәктәбе 7-16 июль көннәрендә «Алабуга» МИЗ базасында уздырылачак. Анда Россия һәм чит илләрдәге вузларда белем алучы иң яхшы студентлар һәм аспирантлар (50 дән дә ким түгел), предприятие һәм оешма җитәкчеләре, компанияләрнең топ-менеджерлары, фән эшлеклеләре, журналистлар йөзендә экспертлар (20дән дә ким түгел) чакырылачак.
Чараның төп максаты – инженер бизнесында профессионалларның яңа челтәрен булдыру, университетларда эшкуарлык мохитен формалаштыруга ярдәм итү, инженер бизнесы буенча экспертлар җәмәгатьчелеген булдыру, техник университетларда эшкуарлык һәм инженер бизнесы буенча уку программаларын эшләүгә булышлык күрсәтү.
Мәктәп эшендә катнашу өчен, klipper-russia.ru сайтында анкета тутырырга, click@klipper-russia.ru адресына ни өчен катнашасыгыз килүен аңлаткан хат җибәрергә һәм 2015 елның 15 маена кадәр оештыру взносын түләргә кирәк.