Илдар Халиков: Берләшкән Гарәп Әмирлекләре Татарстан Республикасының мөһим икътисадый партнерларының берсе булып тора

Берләшкән Гарәп Әмирлекләре бүгенге көндә Татарстан Республикасының мөһим икътисадый партнерларының берсе булып тора. Бу хакта бүген Татарстан Республикасы Премьер-министры Илдар Халиков БГӘ икътисад министры урынбасары Абдалла Әл Салих җитәкчелегендәге Берләшкән Гарәп Әмирлекләре делегациясе әгъзалары белән очрашуда белдерде.

Очрашу ТР Хөкүмәте йортында узды, анда Татарстан ягыннан ТР Премьер-министры урынбасары – ТР мәгълүматлаштыру һәм элемтә министры Роман Шәйхетдинов, ТР Премьер-министры урынбасары – ТР авыл хуҗалыгы һәм азык-төлек министры Марат Әхмәтов, ТР икътисад министры Артем Здунов, ТР Инвестицион үсеш агентлыгы җитәкчесе Талия Миңнуллина катнашты.

Искә төшерәбез: Берләшкән Гарәп Әмирлекләре делегациясе Татарстанда танышу максаты белән булачак (2015 елның 28 февраленнән 5 мартка кадәр). Программада сәнәгать объектларында булу, республика икътисады һәм Татарстан территориясендә гамәлгә ашырыла торган кызыклы инвестиция проектлары белән танышу каралган.

Кунакларны сәламләп, Илдар Халиков Татарстан Республикасы Президенты Рөстәм Миңнеханов исеменнән БГӘ эшмәкәрлек вәкилләренең төбәккә зур кызыксыну күрсәтүләре өчен рәхмәт белдерде.
Илдар Халиков кыскача Татарстанның сәнәгать потенциалы турында сөйләде, иң мөһим проектлар һәм икътисадның үсеш нокталарын билгеләде. Аерым алганда, ул төбәкнең икътисадый нигезе – ул нефть, нефть чыгару, нефть эшкәртү һәм нефть химиясе, машина төзелеше, приборлар төзү, шулай ук авыл хуҗалыгы, дип искәртте. Ул ассызыклаганча, сөт, ит, бәрәңге җитештерү буенча Татарстан алдынгы төбәкләренең берсе санала.

Моннан тыш, бүген төбәктә Россия һәм чит ил инвесторларын җәлеп итү өчен җитди инфраструктура булдырылган, дип белдерде ТР Премьер-министры. Бу – технопарклар, индустриаль мәйданчыклар, бизнес-инкубаторлар челтәре. Татарстан районнарының берсендә урнашкан “Алабуга” МИЗы Россиядә барлык МИЗ инвестицияләре гомуми күләменнән 60%ын җәлеп итте, диде ул.

Технопаркларның киләчәктәге үсешенә килгәндә, Илдар Халиков уңай үрнәк сыйфатында бүген Европада иң зур индустриаль паркларның берсе “Мастер” КИПын атады, аның мәйданы 642 мең кв.м. һәм ул 95 процентка тулы. “Аның мәйданын 1 млн кв. м. га кадәр арттыру турында карар кабул ителде, - диде ТР Министрлар Кабинеты башлыгы, бу мәйданчык үзенә ихтыяҗ булуын исбатлады, монда күп санда компанияләр - Россиядән һәм чит илләрдән автокомпонентлар җитештерү өлкәсендә махсуслашкан күп санлы резидентлар урнашкан.

Без республика өчен үсеш ноктасы булып торган “Иннополис” инновацион шәһәрчегенә кызыксыну белдерсәгез шат булыр идек, диде алга таба Илдар Халиков. Күп IТ-компанияләр “Иннополис” территориясендә урнашу өчен кызыксыну белдерә.

ТР Премьер-министры Татарстанда узачак халыкара дәрәҗәдәге спорт вакыйгалары турында сөйләде һәм БГӘ вәкилләрен аларда катнашырга чакырды.

Үз чиратында, БГӘ икътисад министры урынбасары Абдалла Әл Салих Казанга чакыру өчен рәхмәт әйтте һәм сәфәр кысаларында делегация әгъзалары республика тормышының төрле яклары, икътисади һәм инвестиция потенциалы белән таныша алачагына ышаныч белдерде.