Рөстәм Миңнеханов: «Без куелган бурычлар нигезендә хосусыйлаштыру буенча карарлар кабул итәбез»

Татарстан җитәкчелеге, нәтиҗәле стратегик партнер килү шартларында, дәүләт катнашындагы предприятиеләрен хосусыйлаштыру мәсьәләсен карарага әзер.

Бу хакта бүген Татарстан Республикасы Президенты Рөстәм Миңнеханов Гайдар форумы кысаларындагы "Икътисадның реаль секторы: нәтиҗәлелеккә юл" панель дискуссиясендәге чыгышында белдерде. РФ Дәүләт Думасы спикеры Сергей Нарышкин фикер алышуның модераторы булды.

Дискуссяи барышында “Россия тимер юллары” ААҖ президенты Владимир Якунин, РФ сәнәгать һәм сәүдә министры Денис Мантуров икътисадта дәүләт катнашуы, дәүләт компанияләре, бюджет оешмалары һәм оборона-сәнәгать комплексы предприятиеләренә аутсорсинг мөмкинлеге турындагы фикерләре белән уртаклаштылар. Шулай ук экспертлар – Финляндиянең экс-премьеры Эско Ахо, РФ Президенты каршындагы Россия халык хуҗалыгы һәм дәүләт хезмәте академиясе ректоры Владимир Мау фикерләрен белдерде.

Татарстан Президентына сүз биреп, Сергей Нарышкин белдергәнчә, республикада хосусый бизнеска инфраструктураны бирү өлкәсендә зур тәҗирбә тупланган, һәм ул Рөстәм Миңнехановтан шул тәҗрибә турында сөйләвен сорады.

Татарстан Республикасы Президенты чыгышында хәбәр иткәнчә, республика милкендә берничә эре предприятие бар. «Һәм дәүләт яки хосусый бизнес нәтиҗәлерәк микән дигән мәсьәлә турында сүз чыкканда, җавап куелган бурычларга бәйле», - дип белдерде Рөстәм Миңнеханов.

Аның сүзләренчә, республика җитәкчелеге эре предприятиеләрнең акцияләр пакетын сату турындагы карарны, сатып алынган бизнесны үстерергә әзер булган стратегик партнер табылса гына, кабул итә. «Үз вакытында без “Россия вертолетлары”на Казан вертолетлар заводындагы өлешебезне күчердек, һәм бүген әлеге карарның дөрес булганын күрәбез – хәзерге вакытта бу республиканың иң уңышлы предприятиеләренең берсе, - дип билгеләде Рөстәм Миңнеханов. – Копрессорлар заводын да, анда безнең контроль пакет иде, “ГМС-Групп”ка сатарга хәл иттек, чөнки базарда бер үзе генә предприятие эшли алмавын аңлый идек».

«Әйтик, «КАМАЗ»да өлешебез юк, әмма без завод белән бик якыннан эшлибез, «Ростехнология» белән дә, чөнки предприятие эшенә бөтен бер шәһәр иминлеге бәйле».

«Регионның чынлап торып икътисад үсешендә ихтыяҗы булырга тиеш, хосусый һәм дәүләт бизнесы булуына карамастан, - дип ышанып әйтте Татарстан Президенты. – Инвесторларны җәлеп итү өчен инженер инфраструктурасы булырга тиеш, һәм бу беренче адымнарны дәүләт башкаруы зарури. Без Татарстанда шуның белән шөгыльләнәбез дә инде».

«Үсеш темплары теләгәнчә зур түгел, ләкин минем фикеремчә, перспективалар әйбәт, республикада масштаблы проектлар гамәлгә ашырыла», - дип белдерде Татарстан Президенты.

Ул шулай ук РФ сәнәгать һәм сәүдә министры Денис Мантуровка мөрәҗәгать итте. «Бүген безнең шөбһә бик зур. Өч көн элек мин сәнәгатьчеләрне, банкирларны җыйдым, һәм без барысы да тукталып калганын күрәбез, - дип белдерде Рөстәм Миңнеханов. – Кредитлар буенча ставкалар бик зур. Моннан тыш, беренче мәртәбә бездә эшсезлек артты. Шуңа күрә РФ Сәнәгать һәм сәүдә министрлыгы, ил Хөкүмәтенә оператив карарлар табуларын үтенәм».