Алгарышлы социаль-икътисадый үсеш территорияләре турында Федераль закон кабул ителде

«Россия Федерациясендә алгарышлы социаль-икътисадый үсеш территорияләре турында» 2014 елның 29 декабрендәге 473-ФЗ номерлы Федераль законда Россия Федерациясендә алгарышлы социаль-икътисадый үсеш территорияләренең хокукый режимы, дәүләт ярдәме чаралары һәм әлеге территорияләрдә эшчәнлек алып бару тәртибе билгеләнә.

Федераль законда алгарышлы социаль-икътисадый үсеш территорияләре дигәндә түбәндәгеләр күз алдында тотыла: бу инвестицияләр җәлеп итү, икътисадның тизләнешле үсешен тәэмин итү һәм халык тормыш-көнкүрешендә уңайлы шартлар булдыру өчен җайлы мохит формалаштыру максатында эшкуарлык һәм башка төр эшчәнлек алып бару буенча Россия Федерациясе Хөкүмәте карары белән аерым хокукый режим билгеләнгән Россия Федерациясе субъекты территориясенең бер өлеше, шул исәптән ябык административ-территориаль берәмлек.
Федераль законга ярашлы рәвештә, әлеге закон үз көченә кергәннән соңгы өч ел эчендә алгарышлы үсеш территорияләре Ерак Көнчыгыш федераль округына кергән Россия Федерациясе субъектлары территорияләрендә, һәм шулай ук, тиешле исемлеккә кертелеп, Россия Федерациясе Хөкүмәте тарафыннан расланган катлаулы социаль-икътисадый вазгыятькә ия моношәһәрләр (Татарстан Республикасыннан әлеге категория буенча төзелгән исемлеккә Яшел Үзән һәм Кама Аланы керә) территорияләрендә төзелә ала, ә өч елдан соң исә – Россия Федерациясенең калган субъектлары территорияләрендә.