Казанда уңышлы бизнес төзү сорауларын тикшерделәр

2014 елның 19 декабрендә «Уникс» мәдәният-спорт комплексында
Татарстан Республикасы Икътисад министрлыгы тарафыннан оештырылган «Ел эшкуары: Алтын йөзлек – 2014» конкурсына нәтиҗәләр ясау кысаларында «Кризиста ничек бизнес булдырырга?» дип аталган мастер-класслар сериясе уздырылды.
Үзенең сәламләү сүзендә Татарстан Республикасы икътисад министры Артём Здунов болай дип билгеләп үтте: «Без бизнес атна кысаларында дәүләтнең чыннан да кече һәм урта бизнеска игътибары арткан әлеге елларда ниләр эшләгәнебезгә экспертлар бәясен ишетергә, без күрсәткән ярдәмнең формаларын һәм методларын бәяләргә, бәлки, кайдадыр яңадан башларга, эшли торган эшләребездә өстенлекләрне билгеләргә телибез. Һәм, әлбәттә, боларның берсен дә сезнең белән кире элемтәдән башка эшләп булмый. Барыбыз өчен дә бәйрәм булган бу көннәрдә без бер-беребезгә якыная, рәсми булмаган шартларда сөйләшә-аңлаша алабыз».
Мастер-класслар башланыр алдыннан Артём Здунов, эшкуарлыкны үстерүгә зур өлеш керткән өчен, Казан (Идел буе) федераль университетын Татарстан Республикасы Икътисад министрлыгының Рәхмәт хаты белән бүләкләде. «Әгәр төгәл, анык методологик база юк икән, планлаштырылганнарның барысын да гамәлгә ашыру мөмкин түгел. Шуңа күрә алга таба безнең эшчәнлек туган университетыбыз белән тыгыз элемтәдә оештырылачак», – дип билгеләп үтте Артём Здунов.
Аннан соң мастер-класслар башланды, әлеге кысаларда иң уңышлы эшкуарлар кризис вакытында бизнесны ничек оештырырга кирәклеге турында сөйләделәр, үз уңышлары тарихы белән уртаклаштылар. Өстәвенә, гомумән алганда, төрле, әмма шул ук вакытта берүк төрле гади генә булмаган шартларда үз эшләрен булдыруга ирешкән Татарстан бизнесменнарыннан тыш, быел мастер-классны федераль дәрәҗәдәге иң кызыклы эшкуарларның берсе – «Экспедиция» бренды иясе һәм «Руян» компанияләр төркеме президенты Александр Кравцов алып барды.
Эксперт ток-шоуында «Турыдан-туры инвестицияләр фонды» компаниясе гендиректоры Руслан Хәлилов, «Мойдодыр» машиналар юу челтәре һәм «Пятое колесо» шиннар монтажлау станцияләре иясе Айдар Исмәгыйлов, «Букет столицы» сәүдә челтәре хуҗасы Евгений Сеньковский, «Ledel» компаниясе гендиректоры Артем Когданин, «Франчайзинг 5» компаниясенең гамәлгә куючысы Артем Захаров, И(б)ФОнда Стратегик инициативалар агентлыгы вәкиллеге җитәкчесе Рафаэль Зәйнетдинов үз уңышлары тарихын сөйләдедәр. Әлеге ток-шоу кысаларында шулай ук Татарстан Республикасы Эшкуарлыкка ярдәм итү үзәге җитәкчесе Дилүс Шәвәлиев тә чыгыш ясады, залдан иң күп сорау да аңа юлланды.
Мастер-класслар тәмамлангач, нәтиҗәләр ясау «Туган авылым» ресторан-күңел ачу комплексында дәвам итте. Анда «Ел эшкуары: Алтын йөзлек – 2014» конкурсында җиңүчеләрне бүләкләү тантанасы узды.