Татарстан Республикасы икътисад министры Артём Здунов Татарстан Республикасы Биотехнологияләр төбәк инжиниринг үзәгенең стратегик сессиясендә катнаша

2014 елның 16 декабрендә Татарстан Республикасы Сәүдә-сәнәгать палатасында «Татарстан Республикасы Биотехнологияләр төбәк инжиниринг үзәге» Акционерлык җәмгыятенең «Татарстан Республикасы Биотехнологияләр төбәк инжиниринг үзәге – юл башы, үсеш: кече һәм урта эшкуарлыкка ярдәм итүдән – төбәктә биотехнологияләр өлкәсендә кластер формалаштыруга» дип аталган стратегик сессиясе уздырыла.
Чарада шулай ук Россия Федерациясе Икътисадый үсеш министрлыгы вәкиле – Социаль үсеш һәм инновацияләр департаментының инновацияле проектлар бүлеге башлыгы урынбасары Семен Вуйменков та катнашты.
Сессиядә катнашучыларны сәламләү сүзендә Татарстан Республикасы икътисад министры Артём Здунов соңгы ике елда Татарстан Республикасында кече һәм урта бизнеска ярдәм йөзеннән шактый сандагы инновацияле инфраструктура объектлары төзелүен билгеләп үтте: «Без фән һәм реаль сектор арасындагы өзеклекләрне юкка чыгару өчен, бизнеска инновацияле хезмәтләр күрсәтүне оештырырга кирәклеген аңлыйбыз», – диде ул.
«Бүгенге стратегик сессия Татарстан Республикасы Биотехнологияләр төбәк инжиниринг үзәген төзүгә багышлана. Без фәнни даирәләрнең, кече һәм урта эшкуарлык субъектларының игътибарын җәлеп итәргә, яңа инжиниринг үзәге эшчәнлеге өлкәсенә, аның эш юнәлешләренә игътибарларын туплауларын теләр идек», – дип дәвам итте сүзен Артём Здунов. Ул инжиниринг үзәгенең нәтиҗәлелекне бәяләүнең шактый төгәл күрсәткечләре булачагын билгеләп үтте. Ул шулай ук алга таба әлеге инжиниринг үзәгенең медицина, медицина технологияләре өлкәсендәге эшчәнлеге кырларын киңәйтү мөмкинлеге каралуына да басым ясады.