Татарстан Республикасы икътисад министры Артём Здунов «Опора России» иҗтимагый оешмасының «Кече һәм урта бизнес: төбәк үсеше нокталары» форумында катнашты

2014 елның 12–14 декабре көннәрендә Казан шәһәрендә, Татарстан Республикасы Икътисад министрлыгы һәм Татарстан Республикасы Президенты каршындагы Эшкуарлар хокукларын яклау буенча Вәкаләтле вәкил ярдәме белән, «Опора России» Гомумроссия иҗтимагый оешмасы тарафыннан «Кече һәм урта бизнес: төбәк үсеше нокталары» форумы оештырылды. Әлеге чарада Россия Федерациясенең утыздан артык төбәгеннән килгән вәкилләр катнашты.
2014 елның 13 декабрендә, көннең беренче яртысында, пленар утырыш узды. Утырышта кече һәм урта бизнесны үстерү буенча Татарстан Республикасында алып барылган эш турында Татарстан Республикасы икътисад министры урынбасары – Эшкуарлыкны үстерү департаменты башлыгы Рөстәм Сибгатуллин сөйләде.
Соңрак форум кысаларында IT-паркта Татарстан Республикасы Премьер-министры Илдар Халиковның «Опора России» төбәк бүлекләре рәисләре белән очрашуы оештырылды. Чарада шулай ук Татарстан Республикасы икътисад министры Артём Здунов та катнашты.
Исегезгә төшерик, бүгенге көндә Татарстан Республикасында муниципаль дәрәҗәдәге 38 сәнәгать мәйданчыгы эшли, тагын 20дән артыгы төзелеп килә.
Андагы резидентлар өчен дәүләт финанс ярдәме күрсәтелә: җиһазлар сатып алуга чыгымнарны 50%ка кадәр субсидияләү, кредитлар буенча һәм шулай ук лизинг килешүләре буенча процент ставкаларын субсидияләү. Ел саен шәхси паркларның да, муниципаль паркларның да инженерлык инфраструктурасын төзү өчен бюджет акчалары җәлеп ителә.