Казан хакимияте киләсе елда инвестицияләр үсеше торгызылуын көтә

Бүген Казан шәһәре Думасы сессиясендә шәһәр Башкарма комитеты җитәкчесе урынбасары Иван Кузнецов 2015 елга һәм 2016-2017 еллардагы планлы чорга шәһәрнең социаль-икътисадый үсеше фаразларын тәкъдим итте.

ТР башкаласы икътисадына макроикътисади вәзгыятьнең начарлануы, дөньяви финанс базарында займ финанслау мөмкинлеге кыенлашу, читтән продукция кертүне һәм читкә чыгаруны чикләү тискәре йогынты ясый, дип ассызыклады ул. Кузнецов сүзләренә караганда, агымдагы елда Казан икътисады үсешендә уңай динамика күзәтелә. 2014 елның 9 аенда сәнәгать җитештерү үсеше, узган елның шул чоры белән чагыштырганда, 5 процент тәшкил иткән. Кулланучылар базары үсеше 2,8 процент тәшкил иткән. Эшсезләр саны 0, 57 процентка кадәр кимегән.

9 айда Казанда 552,5 мең кв метр торак файдалануга тапшырылган, бу, узган елның шул чорына караганда, 16,9 процентка күбрәк.

Инфляциянең бераз үсеш алуы рубльнең кыйммәте кимү һәм читтән авыл хуҗалыгы продукциясе кертүне чикләүгә нигезләнгән. 9 айда Казанда инфляция 7 процент тәшкил иткән. Фаразларга караганда, бу ел ахырына кадәр шулай калачак.

2014 елда Казан тулаем төбәк продукты 517,6 млрд сум күләмендә бәяләнә. Казанның социаль-икътисади үсеше фаразлары буенча 2015-2017 елларда шәһәрнең тулаем төбәк продукты ел саен 3 процент чамасы үсәчәк. 2017 елда бу күрсәткеч 659 млрд сумнан артык тәшкил итәчәк, дип фаразлана.

2015-2017 елларда сәнәгать җитештерү индексы үсеше 2,5-5,7 процент чамасы булыр дип фаразлана.

Казан хакимияте киләсе елда инвестицияләр үсеше торгызылуын көтә. Әгәр агымдагы елның 9 аенда инвестицияләр күләме 14,3 процентка кимегән икән, 2015 елда 2,4 процент үсеш фаразлана, 2016 елда – 1,6 процент, 2007 елда – 4,7.

2015-2017 елларда торак тапшыру күләме 900 мең кв метр булыр дип фаразлана.

Казанда уртача хезмәт хакы үсеше 110,9 процент чамасы дип фаразланса, уртача хезмәт хакы күләме – 32 701 сум. 2015-2017 елларда 110,9 проценттан 108,9 процентка кадәр тәшкил итәчәк.