«Яшел Үзән» МИЗны киңәйтү Татарстан икътисадына 300 млрд сум инвестицияләр җәлеп итәчәк
Рәсәй Хөкүмәтенең сәнәгать-җитештерү тибындагы «Яшел Үзән» махсус икътисадый зонасын киңәйтү турындагы карарын гамәлгә ашыру өчен кирәкле өстәмә килешү имзаланды. Документ Түбән Кама муниципаль районындагы яңа мәйданчыкны МИЗ составына кертүне беркетә.
Өстәмә килешү махсус икътисадый зонаның яңа чикләрен билгели, проектта катнашучылар арасында вәкаләтләрне бүлешә һәм яңа мәйданчыкның инженерлык һәм транспорт инфраструктурасын үстерү буенча йөкләмәләрне билгели. Документ нигезендә инфраструктураны үстерү, бюджеттан тыш финанслау чыганакларын җәлеп итеп, 2029 елга кадәр Татарстан Республикасы бюджеты акчалары хисабына 50 млрд сумнан да ким булмаган күләмдә тәэмин ителәчәк.
«Хөкүмәт тарафыннан махсус икътисадый зонаны киңәйтү турында карар кабул ителгәннән соң да мөһим этап башлана - проектны гамәлдә тормышка ашыру. Өстәмә килешүгә кул кую яңа мәйданчыкны үстерүгә күчәргә мөмкинлек бирә: инфраструктура булдыруга, җир мөнәсәбәтләрен рәсмиләштерүгә һәм булачак резидентларны озатып йөрүгә. Нәкъ менә бу эш инвестиция планнары реаль производстволарга, эш урыннарына һәм төбәк өчен яңа салым керемнәренә әверелә торган шартлар тудыра», - дип билгеләп үтте Рәсәй Икътисадый үсеш министры урынбасары Святослав Сорокин.
Проект 300 миллиард сум күләмендә шактый инвестицияләр җәлеп итүне күздә тота. 1800дән артык эш урыны булдыру, бәясе 50 миллиард сумнан артып киткән заманча инфраструктураны үстерү, шулай ук 2035 елга кадәр 62,2 миллиард сумлык салым потенциалын формалаштыру көтелә.
«Рәсәй Федерациясе Хөкүмәте һәм икътисадый үсеш министрлыгы ярдәме белән территорияләрне киңәйтү, чималны тирәнтен эшкәртү өчен кирәкле продукция чыгаруны да кертеп, сигез яңа югары технологияле производство урнаштырырга мөмкинлек бирәчәк. Безнең өчен мөһим, һәр инвестицион проект – яңа эш урыннары, салым базасын үстерү һәм технологик суверенитетны ныгыту. Безнең уртак бурыч – инвесторлар яңа территориядә үз планнарын мөмкин кадәр тизрәк тормышка ашыра алсын өчен барлык йөкләмәләрне үтәүне тәэмин итү», - дип билгеләп үтте Татарстан Республикасы Премьер-министры урынбасары - Татарстан Республикасы икътисад министры Мидхәт Шаһиәхмәтов.