Яшьләр эшмәкәрлегенең федераль конкурсына гаризалар кабул итү 23 мартка кадәр озайтылды
Быел яшьләр эшмәкәрлегенең “Безнекен булдыр” Бөтенрәсәй конкурсында катнашу өчен рекордлы санда гаризалар бирелгән иде. Аларның саны 8 меңнән артып китте, теләүчеләр географиясе илнең барлык 89 төбәген колачлады. Эшмәкәрләр ягыннан зур кызыксыну белән бәйле рәвештә, оештыручылар - Стратегик инициативалар агентлыгы, КУЭ Корпорациясе, “Яшьләр эшмәкәрлек инициативасы” фонды һәм “Эшлекле Рәсәй” - гаризалар кабул итүне 23 мартка кадәр озайту турында карар кабул иттеләр.
Элегрәк хәбәр ителгәнчә, Татарстан бөтенрәсәй яшьләр эшмәкәрлеге конкурсына гаризалар саны буенча беренче унлыкта урнашкан. Республика яшь эшмәкәрләрдән (14 яшьтән 35 яшькә кадәр) 200дән артык гариза белән беренче унлыкка керде.
Шулай ук “Үсеш платформасы” һәм “Ростелеком”нан яңа өстәмә номинацияләр турында билгеле булды.
Партнерлык кысаларында 10 җиңүче компания “Үсеш платформасы” программасына (эшмәкәрләргә ярдәм программасы) кушылырга һәм аның барлык мөмкинлекләренә: мәйданчык белән эшләү буенча компетенцияләрне арттыруга, шәхси менеджерны озата баруга һәм платформа белән эшләүнең барлык этапларында ярдәм итүгә ирешергә мөмкинлек алачак.
Ростелеком федераль конкурста катнашучыларның технологик проектларын хуплаячак һәм аның экспертлары бизнесның өлгерү дәрәҗәсенә һәм эшчәнлек юнәлешенә бәйле рәвештә җиңүчеләр өчен индивидуаль треклар эшләячәк. Илнең иң эре цифрлы интеграторының профильле белгечләре яшь эшмәкәрләргә продуктны дөрес “төрергә”, маркетинг һәм сату стратегиясе мәсьәләләрен ачыкларга ярдәм итәчәк. Махсус номинацияләрдә төп блок җиңүчеләре исәбеннән проектлар да, җиңү өчен берничә балл җитмәгән конкурс финалистлары да җиңүче була ала.
Быел гомуми приз фонды ун тапкыр арттырылды һәм 100 млн сум тәшкил итәчәк. Нәкъ 100 җиңүче үз бизнес-проектларын гамәлгә ашыру һәм үстерү өчен 1әр миллион сум алачак. Шулай ук җиңүчеләр КУЭ Корпорациясеннән акселераторны бушлай уза алачак, анда алар үз бизнесларын эшләтеп җибәрү буенча кирәкле белем һәм күнекмәләр ала алачак.
100 җиңүченең исемнәре май аенда Мәскәүдә узган “Безнекен булдыр” Яшь эшмәкәрләр форумында игълан ителәчәк.
Конкурста катнашуга гаризаны түбәндәге сылтама буенча бирергә мөмкин: https://xn--l1agf.xn--p1ai/services/sozdaj-nashe/promo
Исегезгә төшерәбез, узган ел Татарстаннан 2 яшь эшмәкәр полимер материаллар, шулай ук мультимедиа технологияләре өлкәсендә фәнни-җитештерү проекты белән “Безнекен булдыр” конкурсында җиңүче булды.