Татарстанда шәхси эшмәкәрләрнең 41,5% ы - хатын-кызлар

Татарстан Республикасында 50 меңгә якын хатын-кыз эшмәкәр эшчәнлек алып бара.

Хәзерге вакытта Рәсәйдә барлыгы 4,67 миллионга якын шәхси эшмәкәр исәпләнә, шуларның 2 миллионга якыны - хатын-кызлар. Өч ел эчендә алар якынча 500 меңгә арткан.

Рәсәйдә эшмәкәр хатын-кызлар “хатын-кызныкы түгел” дип санаган кайбер өлкәләрдә дә бизнес алып бара. Алай гына да түгел, кайбер мондый эшчәнлек төрләрендә хатын-кызлар гына эшли. Әйтик, Рәсәйдә бары тик ике ШЭ термик күмерләр җитештерә, һәм бу хатын-кызлар. Шулкадәр үк эшмәкәр хатын-кызлар куркынычларны иминиятләштерү белән шөгыльләнә. Хәрби сугышчан машиналар җитештерү, пьезокварц чыгару, дистилляцияләнгән спиртлар катнаштыру һәм макулатура массасыннан кәгазь җитештерү дә гадәти булмаган тармаклар булып тора. Бу өлкәләрнең һәрберсендә хатын-кыз-ШЭ өлеше - 100% тәшкил итә.

Рәсәйдә хатын-кыз эшмәкәрләрнең иң зур концентрациясе сәүдәдә күзәтелә - 43% ка якын, фәнни-техник эшчәнлектә - 10% һәм хезмәт күрсәтүдә - 8% ка якын.

Исегезгә төшерәбез, 2025 елда Татарстан 5 ел эчендә хатын-кыз эшмәкәрләр өлеше арту буенча илдә лидерлар рәтенә керде. Шулай ук бизнеста хатын-кызлар өлешен арттыру буенча лидер төбәкләр арасында Мәскәү, Санкт-Петербург, Карачай-Черкес Республикасы һәм Тыва Республикасы бар.

“Татарстан Республикасы Икътисад министрлыгы „Нәтиҗәле һәм конкурентлы икътисад“ илкүләм проекты кысаларында һәрвакыт комплекслы ярдәм күрсәтергә һәм бизнесны башлап җибәрү этабында яисә аны масштаблаштыруда хатын-кыз эшмәкәрләргә ярдәм итәргә әзер”, - дип ассызыклый министрның беренче урынбасары - Эшмәкәрлекне үстерү департаменты директоры Наталья Кондратова.

ТР Икътисад министрлыгы һәм аның ведомство буйсынуындагы оешмалар ярдәмендә республика эшмәкәрләре отышлы шартларда микрозаймнар, гарантияләр, грантлар, җиһазлар сатып алуга милек һәм лизинг ярдәме, шулай ук финанс булмаган хезмәтләр алырга мөмкин.

Республика бизнесына ярдәм итү чаралары турында Бердәм контакт үзәгенең номеры 8 (843) 524-90-90буенча белергә мөмкин.