Татарстанда «Эшкуар әни» конкурсының төбәк этабында җиңүчене билгеләделәр
Кичә Казанның Эшкуар йортында бизнес идеясе булган әниләр арасында ел саен үткәрелә торган конкурс-белем бирү проекты җиңүчесенең исеме билгеле булды.
18 августтан программада катнашучылар «Минем бизнес» үзәгендә биш көнлек белем бирү интенсивын уздылар – үз өлкәләрендәге әйдәп баручы спикерлардан тренингларга, хатын-кызлар тарафыннан булдырылган гамәлдәге бизнесларга йөрделәр һәм эксперт комиссиясе каршында үз проектларын яклауга әзерләнделәр.
Программа финалында конкурсның 35 финалисткасы экспертлар жюриена үзләренең бизнес-проектларын тәкъдим итте һәм алар җиңүчене билгеләде.
Быел аңа Сабирова Людмила «НЕШкола, можно не только детям» проекты белән танылды. Ул бизнесны үстерүгә 150 мең сум акча алды.
Җиңүченең проекты балаларга һәм өлкәннәргә рәхәтләнеп һәм стресссыз Soft skills - профессиональ дисциплинаара «йомшак күнекмәләр»не үстерергә ярдәм итә. Ярты елдан артык эшләү дәверендә курсларны 200дән артык бала һәм өлкәннәр узган.
«Эшкуар әни» шәхси инициатива белән берлектә системалы ярдәмнең тотрыклы бизнес-проектлар булдырырга мөмкинлек бирүен ачык күрсәтә. Татарстан Икътисад министрлыгы бизнеска ярдәм итүнең төбәк институтлары белән берлектә хатын-кызларга, аларның эшкуарлык потенциалы тулысынча гамәлгә ашырылсын өчен, белем бирү ресурсларына, финанс инструментларына һәм инфраструктурага керү мөмкинлеген бирә», — дип шәрехләде ТР икътисад министрының беренче урынбасары – Эшкуарлыкны үстерү департаменты директоры Наталья Кондратова.
Исегезгә төшерәбез, быел Татарстанда конкурсның төбәк этабына 103 гариза алынган иде.
Узган ел төбәк этабында Казан шәһәреннән «Вышитое счастье» проекты белән Наталья Власова җиңүче булды. Ул йорт өчен җитен эшләнмәләр остаханәсен үстерү һәм Мәскәүдә конкурсның федераль этабында катнашу мөмкинлеге өчен 100 мең сум күләмендә грант алды.