Татарстанның Ислам Хезмәттәшлеге Оешмасы илләре белән товар әйләнеше 38%ка артты һәм якынча 8 млрд.доллар тәшкил итә
«Россия – Ислам дөньясы: КаzanForum» XVI халыкара икътисадый форумы кысаларында ТР Премьер-министры урынбасары – ТР икътисад министры Мидхәт Шаһиәхмәтов Шәех Ибраһим бен Хәлиф Әл Хәлифәнең Эмин Агаларов һәм ВЭБ.РФ һәм Газпромбанк вәкилләре белән берничә эшлекле очрашуында катнашты.
Шулай ук Казан федераль университеты һәм «Ас-Салям» компаниясе белән хезмәттәшлек турында килешүләр дә имзаланды.
Исегезгә төшерәбез, Татарстан Россиядә ислам (партнерлык) банкингы һәм финанслау принципларын кертү буенча 4 сынау төбәгенең берсе булды.
ВЭБ.РФ һәм Татарстан Хөкүмәте хезмәттәшлек итәчәк һәм партнерлык финансларын үстерәчәк. Бу хактагы килешүгә форум кысаларында ТР Рәисе Рөстәм Миңнеханов һәм «ВЭБ.РФ» дәүләт үсеш корпорациясе рәисе Игорь Шувалов кул куйды.
Бүген республикада гражданнарның да, финанс оешмаларының да партнерлык финансларына карата кызыксынуы сизелерлек арта. 2024 елда операцияләр күләме 2023 ел белән чагыштырганда 2,5 тапкырга арткан.
«Россия – Ислам дөньясы: KazanForum» XVI халыкара икътисадый форумының пленар утырышында ТР Рәисе Р.Н.Миңнеханов чыгыш ясады, ул ассызыклаганча, узган ел нәтиҗәләре буенча Татарстанның Ислам Хезмәттәшлеге Оешмасы илләре белән товар әйләнеше 38%ка арткан һәм 8 млрд.долларга якын тәшкил иткән. Ул шулай ук «Россия – Ислам дөньясы» стратегик караш төркеменең уңышлы эше турында да сөйләде.