Рөстәм Миңнеханов: Төп бурычлар – керемнәрнең уңай динамикасын саклау һәм план күрсәткечләрен һичшиксез үтәү
Республика Рәисе Рөстәм Миңнеханов 2024 елның 1 кварталында Татарстанның берләштерелгән бюджеты үтәлеше йомгаклары һәм 2025 елга бурычлары буенча киңәшмә үткәрде. ТР икътисад министрының беренче урынбасары Олег Пелевин катнашты.
Бюджет билгеләнешләре үтәлгән, әмма вәзгыять контроль таләп итә, бигрәк тә табышка салым буенча, анда кайбер предприятиеләр түләүләрне 7 млрд.сумга киметкән.
2024 елда илкүләм проектларны гамәлгә ашыруга 44,6 млрд.сум бүлеп бирелгән (24,7 млрд – федераль акчалар), акчаларның 10,7% ы үзләштерелгән. Федераль үзәк белән килешүләрдә салынган параметрларга ирешергә һәм федераль финанслашуны актив җәлеп итәргә кирәк. Республикада 48 республика программасы гамәлгә ашырыла, шул исәптән 4 яңасы (ТКХ, сөт кухнялары, Гадәттән тыш хәлләр министрлыгы, Эчке эшләр министрлыгы).
Республика Рәисе төбәкләрнең бюджет кредитлары буенча бурычларының 2/3 өлешен исәптән чыгару һәм акчаларны торак-коммуналь хуҗалыкка һәм инфраструктурага юнәлтү турында искә төшерде (Татарстан лимиты – 44,5 млрд.сум). Салым бурычын (12,3 млрд.сум) киметүне контрольдә тоту мөһим.
Шулай ук республикада салым керемнәре 13% ка (394 млрд.сум) арткан, республиканың берләштерелгән бюджетына керемнәр 20% ка арткан. Моннан тыш, үзмәшгульләр саны арта (380 мең кеше, 1 млрд.сумга якын салым түләнгән).
ТР Рәисе Рөстәм Миңнеханов хезмәт хакларын легальләштерү, УСН буенча керемнәрне анализлау, җир салымы һәм салым булмаган керемнәр буенча эшне көчәйтергә кушты. Берләштерелгән бюджет чыгымнары еллык планның 17,3% өлешен тәшкил иткән, ел дәвамында тигезлек кирәк.