Татарстанда фәнне һәм интеллектуаль милекне үстерү өчен цифрлы кораллар турында фикер алыштылар
Бүген Казанда Татарстан Республикасы Фәнни-техник мәгълүмат үзәге базасында Татарстан Республикасы Икътисад министрлыгы ярдәмендә «Фәнгә һәм инновацияләргә ярдәм итүнең санлы инструментлары» түгәрәк өстәле узды, ул «Киләчәк өчен интеллектуаль милек» (IPfF-2025) VI халыкара форум-фестивале кысаларында Халыкара интеллектуаль милек көненә багышланган иде.
Чарада хакимият органнары, фәнни һәм эксперт җәмәгатьчелеге вәкилләре катнашты. Катнашучылар фәнни өлкәне цифрлаштыру, инновацион экосистеманы үстерү һәм интеллектуаль эшчәнлек нәтиҗәләрен коммерцияләштерү мөмкинлекләрен киңәйтү мәсьәләләре буенча фикер алыштылар.
Татарстан Республикасы Икътисад министрлыгыннан катнашучыларга сәламләү сүзе белән Татарстан Республикасы икътисад министры урынбасары Динар Шакиров мөрәҗәгать итте. «Интеллектуаль милек – фән, технологияләр һәм креатив индустрияләр үсешенең нигезе ул. Ул яңа идеяләр булдыруны стимуллаштыра, авторлык хокукларын яклый һәм инновацион үсешкә ярдәм итә. Хәзерге цифрлы дөньяда аның роле көннән-көн арта, ә цифрлы инструментлар интеллектуаль милек базарын үстерү өчен яңа мөмкинлекләр ача», – дип ассызыклады ул.
Министр урынбасары шулай ук Татарстан Республикасы төбәк системасын «Фән һәм инновацияләр» федераль домены белән интеграцияләүнең мөһимлеген билгеләп үтте: «Россия Федерациясе Фән һәм югары белем министрлыгы тарафыннан «Фән һәм инновацияләр» доменында «Төбәк фәнни-технологик үсеше» сервисын булдыру һәм үстерү турында карар кабул ителде. Безнең региональ системаны федераль домен белән интеграцияләү интеллектуаль милек өлкәсен үстерүгә яңа этәргеч бирәчәк һәм безгә бюджет чыгымнарының нәтиҗәлелеген күтәрү генә түгел, фән, технологияләр һәм техника үсешенең өстенлекле юнәлешләреннән чыгып, тикшеренүләр һәм эшләнмәләр тематикасын төгәл планлаштыру мөмкинлеген дә бирәчәк».
Түгәрәк өстәл барышында Татарстан Республикасында фәнни-тикшеренү эшләре нәтиҗәләрен дәүләт исәбенә алу һәм саклауның бердәм системасы эшләве турында докладлар тәкъдим ителде, анда инде 2,5 меңнән артык гражданлык билгеләнешендәге НИОКР турында мәгълүмат бар. Транспорт системаларында ясалма интеллектны куллануга, шулай ук төбәкнең фәнни-технологик үсеше идарәсендә электрон бюджетлаштыруга аерым игътибар бирелде.
Катнашучылар фәнни мәгълүматны эзләү, анализлау һәм исәпкә алу өчен махсуслаштырылган цифрлы платформалардан файдалануның перспективалы булуын билгеләп үттеләр, бу исә интеллектуаль милек белән нәтиҗәлерәк идарә итүгә ярдәм итә.
Чара йомгаклары буенча фәнгә һәм инновацияләргә ярдәм итүнең цифрлы инструментларын алга таба үстерү өчен барлык кызыксынган яклар арасында диалогны дәвам итүнең мөһимлеге ассызыкланды.