Яңа җитештерү линияләре старт алды: Мидхәт Шаһиәхмәтов Казанда «РГК» компаниясенең модернизацияләнгән производствосын эшләтеп җибәрүдә катнашты
2025 елның 14 мартында "Казаноргсинтез" директорлар советы утырышы кысаларында Татарстан Республикасы Премьер-министры урынбасары – Татарстан Республикасы икътисад министры Мидхәт Шаһиәхмәтов Казанда «СИБУР» компаниясенең сәнәгать мәйданчыгы эчендә урнашкан модернизацияләнгән торбалар производствосын эшләтеп җибәрүдә катнашты.
2023 ел ахырында "Казаноргсинтез" бу заводны активны үстерү һәм коллективны саклап калу шарты белән профильле милекчегә саткан.
"РГК" компаниясе торба производствосын модернизацияләүнең беренче этабын тәмамлады, аңа ВТБ банкы (ГАҖ) һәм Сәнәгатьне үстерү фонды ярдәмендә 1 миллиард сумга якын инвестиция салынган. Казанышлар арасында – диаметры 1,6 метрга кадәр булган күп катлы полимер торбалар һәм ныклыгы югары булган диаметры 2,4 метрга кадәр булган уникаль спираль торбалар җитештерү линиясен эшләтеп җибәрү.
СИБУР импортны алмаштыра торган блок-сополимер маркаларын һәм RC ПЭ төсле маркаларын җитештерүне үзләштергән. Әлеге чишелеш торбаларның хезмәт итү вакытын 100 елга кадәр арттыру исәбенә торак-коммуналь хуҗалык челтәрләренең ышанычлылыгын арттырачак (металл торбалар белән чагыштырганда), ремонт ешлыгын һәм эксплуатация чыгымнарын киметәчәк, инфраструктураның экологик тотрыклылыгын арттырачак.
Министр газ һәм су белән тәэмин итүне дә кертеп, сәнәгатьнең төрле тармаклары өчен продукция чыгарырга мөмкинлек бирә торган өр-яңа җайланмалар белән танышты. Визит барышында компаниянең технологик үсештәге уңышлары һәм төбәк икътисадына керткән өлеше билгеләп үтелде.