Юрий Зубов: патентлар һәм товар билгеләре ярдәмендә Татарстан һәм Мәскәү бизнесы 1 млрд.сумнан артык ташламалы кредит алды
2023 елдан Россиядә интеллектуаль милек залогына ташламалы кредитлау программасы гамәлдә. Бүген финанслауга Мәскәү һәм Татарстан Республикасы эшкуарлары өмет итә ала. Бүгенге көнгә мәскәүлеләр 1,13 млрд.сумнан артык акча алган, ә 2024 ел ахырында старт алган Татарстан вәкилләре патентлар һәм товар билгеләре залогына 40 млн.сумлык биш кредитны берләштергән инде.
Проект үз географиясен киңәйтәчәк һәм фәнгә һәм бизнеска үз идеяләрен алга этәрергә мөмкинлек бирәчәк. Бу хакта Интеллектуаль милек буенча федераль хезмәт җитәкчесе Юрий Зубов Роспатент коллегиясендә сөйләде.
«Интеллектуаль милек Россиядә ликвидлы икътисадый активка, фән һәм эшкуарлыкны үстерү өчен нәтиҗәле коралга әверелә. 2023 елдан дәүләт башлыгы кушуы буенча Роспатент Икътисадый үсеш министрлыгы, Россия Банкы һәм Мәскәү хөкүмәте белән берлектә кече һәм урта бизнесны интеллектуаль милек залогына кредитлау проектын гамәлгә ашыра. Узган елда Татарстан Республикасы хакимияте үзләренең пилот проектын эшләтеп җибәрде», – дип хәбәр итте Роспатент җитәкчесе Юрий Зубов ведомство коллегиясендә.
Интеллектуаль милек залогы белән кредитлау «Нәтиҗәле һәм конкурентлы икътисад» илкүләм проекты кысаларында мөмкин.
Мәскәүдә Роспатентта теркәлгән интеллектуаль милек объектлары булган кече һәм урта эшкуарлык субъектлары Мәскәү инновацион кластеры аша кредит алуга гариза бирә ала. Предприятиеләр өчен поручитель булып Мосгарантфонд тора. Ә кредиторлар – Сбербанк, ВТБ банкы, Промсвязьбанк һәм Совкомбанк. 2023 елдан башкала компанияләре 1,13 млрд сумлык 34 кредит килешүе төзегәннәр. Нигездә бу мәгълүмат технологияләре, медицина һәм логистика өлкәләрендә эшләүче оешмалар.
2024 ел ахырында интеллектуаль милек залогына ташламалы кредитлау программасына Татарстан Республикасы кушылды. Анда Татарстан Республикасы Фәнни-техник мәгълүмат үзәге, Татарстан Республикасы Эшкуарлыкка ярдәм фонды (кредитлар бирә) һәм Татарстан Республикасы Гарантия фонды (кредитлар буенча поручитель) катнаша.
Стартта ук җирле компанияләр 40 млн сумлык биш кредит алган инде. Болар: «МЗИТК» ҖЧҖ (7,25 млн.сум), «Инстромет» ПКФ ҖЧҖ (15 млн.сум), «ФЗП» ҖЧҖ (7,7 млн.сум), «Точкацветов» ҖЧҖ (4,56 млн.сум) һәм «ДОКСАЛ» ДК (5 млн.сум). Татарстанның тагын 18 компаниясе интеллектуаль милек залогына 270 млн.сумлык ташламалы кредитлар сорап мөрәҗәгать иткән, дип хәбәр иттеләр Татарстан Республикасы Икътисад министрлыгы матбугат хезмәтендә.
Залог сыйфатында технологияләргә саклау таныклыклары гына түгел, товар билгеләре дә кулланылырга мөмкин. Мәсәлән, Татарстанда теркәлгән «Точкацветов» ҖЧҖ һәм «Инстромет» ПКФ ҖЧҖ товар билгеләре залогына 20 млн.сумга якын акча алганнар.
Интеллектуаль милек залогына кредит бирү өчен шартларның берсе булып интеллектуаль милек объектларына бәйсез бәя бирү тора. Аны, шул исәптән, Хәрби, махсус һәм икеләтә билгеләнештәге интеллектуаль эшчәнлек нәтиҗәләрен хокукый яклау буенча федераль агентлык (ФАПРИД) гамәлгә ашыра.