Татарстан Республикасы Икътисад министрлыгында җайга салу йогынтысын бәяләүнең алдынгы практикалары турында фикер алыштылар
2024 елның 25 февралендә Татарстан Республикасы Икътисад министрлыгы «Республика норматив хокукый актлары проектларының җайга салу йогынтысын бәяләү: максатлар һәм бурычлар, үткәрү тәртибе, иң яхшы тәҗрибәләр мисаллары. Мәҗбүри таләпләрне куллануны бәяләү» темасына укыту семинарын уздырды.
Семинарны Татарстан Республикасы икътисад министры урынбасары Сәрия Сираҗиева ачып җибәрде. Сәламләү сүзендә ул билгеләп үткәнчә, җайга салу йогынтысын бәяләүне уздыру сыйфаты Россия Федерациясе субъектларында инвестицион климат торышының илкүләм рейтингында Татарстан Республикасы позициясенә турыдан-туры йогынты ясый.
Чарада Татарстан Республикасы Төзелеш, архитектура һәм торак-коммуналь хуҗалыгы министрлыгы, Татарстан Республикасы Транспорт һәм юл хуҗалыгы министрлыгы, Татарстан Республикасы Дәүләт торак инспекциясе, Татарстан Республикасы Дәүләт төзелеш күзәтчелеге инспекциясе, Татарстан Республикасы Үзйөрешле машиналар һәм башка төр техниканың техник торышына күзәтчелек идарәсе вәкилләре катнашты.
Семинар барышында җайга салу йогынтысын бәяләүне уздыру (ОРВ), мәҗбүри таләпләрне куллануга экспертиза һәм бәяләүнең максатлары һәм бурычлары каралды, күрсәтелгән процедураларны үткәрү тәртибе өйрәнелде, иң яхшы региональ тәҗрибәләргә мисаллар каралды.
Катнашучыларга шулай ук җайга салу йогынтысын бәяләүнең сыйфатын арттыру буенча төп бурычлар да җиткерелде: бизнес-берләшмә вәкилләрен җәлеп итеп, ачык консультацияләр үткәрү, аларга кертелгән көйләү нәтиҗәсендә барлыкка килгән эшкуарлык берләшмәсе чыгымнарын һәм альтернатив көйләү ысулларын тасвирлауны кертеп, җыелма хисапларны тиешенчә тутыру.
Бу агымдагы елда Татарстан Республикасы Икътисад министрлыгы үткәрә торган семинарлар сериясеннән республика башкарма хакимият органнары өчен беренче укыту семинары. Семинарларның максаты – ОРВ өлкәсендә белемнәр алу һәм тирәнәйтү, мәҗбүри таләпләрне куллануны бәяләү, катнашучыларның һөнәри компетенциясен күтәрү, шулай ук җайга салу йогынтысын бәяләүнең алдынгы тәҗрибәсен кертү.