Татарстанның яшь эшкуарлары проектны үстерүгә 1 млн.сумлык грант алырга мөмкин
Яшьләр эшкуарлыгының «Создай Наше» федераль конкурсына теркәлү башланды. Бу Стратегик инициативалар агентлыгы (АСИ), КУЭ корпорациясе һәм «Яшьләр эшкуарлык инициативасы» фондының уртак проекты.
Сайлап алуга 14 яшьтән 28 яшькә кадәрге эшкуарлар чакырыла. Быел ике юнәлеш: «Бизнессыз яшьләр» һәм «3 яшькә кадәрге бизнес». Һәр катнашучыга эшкуарлык эшчәнлеге нигезләре буенча укулар узарга, ә аннары яңа бизнес ачу яки гамәлдәге бизнесны масштаблаштыру проектын эшләргә туры киләчәк.
Конкурс нәтиҗәләре буенча экспертлар 30 җиңүчене билгеләячәк, алар КУЭ корпорациясеннән 1 млн.сум һәм махсус акселерация программасында катнашу хокукын алачак.
«Создай Наше» конкурсында катнашу – яшь эшкуарларга финанслар алу мөмкинлеге генә түгел, ә бизнесны уңышлы алып бару өчен кирәкле белем, күнекмәләр алу һәм танышулар мөмкинлеге дә ул. Агентлык үз идеяләрен тормышка ашырырга һәм илнең икътисадый үсешенә өлеш кертергә әзер инициативалы яшьләргә ярдәм итәргә омтыла. Бүген яшь эшкуарлар – катлаулы бурычларны хәл итәргә һәм безнең икътисадны алга этәрергә сәләтле иртәгәге лидерлар», – дип билгеләде СИА башлыгы Светлана Чупшева.
22 апрельдән башлап бер ай дәвамында экспертлар катнашучыларның эшләренә бәя бирәчәк һәм җиңүчеләрне билгеләячәк. Аларның исемнәре 26 майда тантаналы бүләкләү вакытында әйтеләчәк. Иң яхшы яшь эшкуарлар КУЭ корпорациясенең акселерация программасына грантлар һәм чакырулар алачак.
«Узган ел беренче мәртәбә «Создай наше конкурсын үткәргәндә, без яшьләрнең аңа карата зур кызыксынуын күрдек. Илнең 88 төбәгеннән барлыгы 5 меңнән артык кеше катнашырга теләк белдерде, – дип хәбәр итте КУЭ корпорациясе генераль директоры Александр Исаевич. – Гаризалар бирү кампаниясе тәмамланганнан соң да безгә теркәлергә өлгермәгән кешеләрдән яңа конкурс турында сораулар белән мөрәҗәгатьләр килде. Аның ихтыяҗын күреп, икенче сезон ясарга карар кылынды».
«Яшь эшкуарлар – ул илнең киләчәген тудыра торган көч. Аларның инициативаларына һәм яңа проектларны үстерүдә ярдәм итү – дәүләтнең иң мөһим бурычларының берсе. «Создай наше» конкурсы яшьләргә бизнес юлындагы киртәләрне җиңәргә, үз идеяләренә ышанырга һәм үзләрен новаторлар буынының бер өлеше итеп тоярга ярдәм итә. Узган ел нәтиҗәләре проектның әһәмиятен күрсәтте: 30 эшкуар үзләрен таныта һәм дөньяны инде хәзер үк үзгәртергә әзер булуларын исбатлый алды. Бу укыту һәм остазлык кына түгел, бу иртәгәге көн өчен җаваплылыкны үз өстенә алырга әзер булучылар өчен реаль мөмкинлек», — дип билгеләде «Деловая Россия» рәисе Алексей Репик.
«Создай НАШЕ» – яшьләр эшкуарлыгына ярдәм итү буенча СИА системалы эшенең мөһим элементы. Әлеге инициатива кысаларында без шулай ук «Конструкториум» цифрлы платформасын актив үстерәбез. Конкурста катнашу барлык теләүчеләр өчен мөмкин кадәр ачык һәм мөмкинлекле булырга тиеш. Шуңа күрә сайлап алуның барлык этаплары онлайн уза, бу бөтен ил яшьләренә үзләрен һәм үз талантларын күрсәтергә уникаль мөмкинлек бирә», – дип ассызыклады СИА «Яшь профессионаллар» юнәлеше директоры Александр Вайно.
«Создай Наше» конкурсына 3 мартта Мәскәү буенча 15:00 сәгатькә кадәр теркәлергә мөмкин. Укулар 11 мартта башлана һәм өч атна дәвам итә. Бу вакыт эчендә катнашучылар белән профессиональ эшлекле берләшмәләр экспертлары һәм бизнесның уңышлы вәкилләре үз тәҗрибәләре белән уртаклашачак.
Гаризаны МСП.РФ цифрлы платформасында бирергә мөмкин. Беренче «Создай Наше» конкурсы 2024 елның апрелендә узды. 30 җиңүче (20 регионнан) үз бизнесларын үстерүгә 1 млн.сум күләмендә грант, шулай ук «КУЭ: яшьләр проектлары акселераторы» программасына чакыру алды.