2024 елда Татарстанда профилактик визитлар өлеше 72% арткан
Гамәлдәге мораторий шартларында Татарстанда профилактик визитлар өлеше арта. Республика эшкуарлары 2024 елда мөмкин булган хокук бозуларны бетерүдә 2000 тапкырдан артык ярдәм күрсәтү коралын кулланганнар.
Тулаем республика буенча 2024 елда 2 091 профилактик визит үткәрелгән, ә 2023 елда шундый 1 514 визит ясалган. Елдан елга үсеш 72% тәшкил итә.
Татарстан Республикасы икътисад министры урынбасары контроль органнары эшчәнлегенә профилактика инструментларын, хәвеф-хәтәргә юнәлтелгән якын килүне, «кисәтү - беренче җәза» механизмын кертү нәтиҗәсендә контроль (күзәтчелек) процедураларының гомуми санында профилактик чаралар өлеше 60% тәшкил итте, дип сөйләде.
«Планлы тикшерүләрне гамәлдән чыгарганнан соң, бизнесның имин эшләвенең төп коралы профилактик визитлар булды. Профилактик визитны уздыру форматы артык административ басымнан башка эшкуарлар белән үзара хезмәттәшлек режимында закон таләпләрен үтәүгә ирешергә мөмкинлек бирә. Визитның төп максаты – эшкуар эшчәнлегенә куела торган барлык таләпләрне һәм хокук бозулар турындагы мәгълүматны җиткерү», - дип уртаклашты Гөлназ Исмәгыйлова.
Ул бизнесны әлеге инструменттан актив файдаланырга һәм контроль органнарыннан консультатив һәм методик ярдәм алудан баш тартмаска чакырды.
Шулай ук сәламәтлек саклау, балаларга социаль хезмәт күрсәтү, балаларга гомуми туклану өлкәсендә эшчәнлек алып баручы мәгариф оешмаларына, учреждениеләргә карата планлы тикшерүләр урынына мәҗбүри профилактик визит үткәрелергә мөмкин, дип хәбәр итте. Мәҗбүри профилактик визит уздыру вакыты 10 эш көненнән артмаска тиеш һәм экспертиза, сынаулар уздыру өчен кирәкле вакытка озайтылырга мөмкин.
Ачыкланган хокук бозуларны бетерү турында күрсәтмә, әгәр хокук бозулар мәҗбүри профилактик визит уздыру тәмамланганчы бетерелмәгән булса бирелә.
РФ Дәүләт хезмәтләре порталында профилактик визит һәм консультация уздыруга гариза бирү генә түгел, уздырылган профилактик чара нәтиҗәләре буенча кире элемтәне калдыру мөмкинлеге дә гамәлгә ашырылган. Бу визит вакытында күзәтчелек органнары тарафыннан кертелгән ихтимал хокук бозуларны ачыкларга һәм бизнесның аның сыйфатыннан канәгать булуын бәяләргә мөмкинлек бирәчәк.