Татарстанда МХО хезмәткәрләре булган компанияләргә финанс ярдәме күрсәтү программасы эшләнде
Татарстанда хезмәткәрләре махсус операциядә катнашкан эшкуарлар ташламалы дәүләт финанс ярдәменә дәгъва итә ала. «Кече һәм урта эшкуарлык» илкүләм проекты кысаларында республикада «МХО ярдәм» махсуслаштырылган продукты эшләнде.
«Татарстанда кече һәм урта бизнес хезмәткәрләре арасында контракт төзүчеләр һәм МХО китүчеләр бар. Мондый компанияләргә ярдәм итү өчен без еллык 1% киметелгән ставка буенча махсус финанс продукты эшләдек. Уңайлы шартлар хезмәткәрләр китү белән бәйле теләсә нинди вакытлы чыгымнарны юкка чыгарырга, һәм өстәмә рәвештә компаниягә ярдәм итәргә, аларга үсешкә кирәкле финансларны җәлеп итәргә ярдәм итәргә тиеш», - дип шәрехләде Татарстан Республикасы икътисад министрының беренче урынбасары Наталья Кондратова.
РФ Үзәк банкының төп ставкасы артуга карамастан, «МХО ярдәм» продукты буенча ставка минималь дәрәҗәдә елына 1% кала. Моннан тыш, түләүләрне ярты елга кичектерергә мөмкин. Шулай ук заемны еллык 0,1% максималь киметелгән ставка буенча дәүләт поручительлеге белән тәэмин итү мөмкин.
«Кече һәм урта эшкуарлык» илкүләм проекты буенча 300 меңнән 5 млн сумга кадәр ярдәмне теләсә нинди эшкуарлык ихтыяҗлары өчен 3 айдан 3 елга кадәр срокка алырга мөмкин.
Программа шартлары буенча, эшкуарның контракт буенча хәрби хезмәткә заемга гариза бирү вакытына бер яки берничә хезмәткәре киткән булырга тиеш. Хезмәткәрләрнең махсус операциягә китү вакыты әһәмиятле түгел – ярдәмгә МХО ташламалы программаны гамәлгә ашырганчы яки гамәлгә ашырган вакытта киткән хезмәткәрләре булган компанияләр дәгъва итә ала.
Ярдәмгә гаризаны «МСП.РФ» порталында онлайн бирергә мөмкин. Анда ук кирәкле документлар пакеты белән дә танышырга була.
Исегезгә төшерәбез, Татарстан Республикасында бизнеска һәм үзмәшгульләргә дәүләт ярдәме «Кече һәм урта эшкуарлык» илкүләм проекты кысаларында ТР Икътисад министрлыгы һәм ведомство буйсынуындагы ярдәм институтлары тарафыннан гамәлгә ашырыла.