ТР Инвестиция советы яңа инвестиция проектларын хуплады
Бүген Татарстан Республикасы Рәисе Рөстәм Миңнеханов Татарстан Республикасы Инвестиция советының быелгы беренче утырышын уздырды. Чара Татарстан Республикасы Премьер-министры урынбасары – Татарстан Республикасы икътисад министры Мидхәт Шаһиәхмәтов катнашында узды.
Беренче булып «Аммоний» АҖдән аммиак һәм карбамид җитештерү комплексы төзү проекты карала. Проектны «Аммоний» АҖнең үсеш буенча директоры Александр Осипов тәкъдим итте. Менделеевск районында аммиак җитештерү комплексын булдыру күздә тотыла, эш урыннарының планлаштырылган саны – 500.
Аннан соң асфальт-бетон заводы төзү өчен җитештерү базасын оештыру проекты тәкъдим ителде. Проект турында «Стройресурс» ҖЧҖ җитештерү буенча директоры Газинур Госманов сөйләде. Ул, аерым алганда, компаниянең автомобиль юллары төзүен һәм күп тапкырлар төзелеш материаллары җитмәве белән очрашканын хәбәр итте, бу үз җитештерүен булдырырга этәргеч ясаган. Җитештерү предприятиесе Тукай районында урнашачак. 35 яңа эш урыны булдырылачак.
Алга таба «Зеленодольск» индустриаль паркы хезмәткәрләре өчен хостел төзү» проектын Дамир Абдрахманов тәкъдим итте. Ул хәбәр иткәнчә, аның компаниясе базарда 15 елдан артык эшли, Идел буе шәһәрләрендә, шулай ук Белоруссия һәм Кыргызстанда тәкъдим ителгән. Проектны гамәлгә ашыру урыны итеп Зеленодольск районы сайланган. Хостел төзелеше ике этапта алып барылырга тиеш, өч корпус төзеләчәк.
Шулай ук «Антиграфити» вандаллыкка каршы саклау каплавы җитештерү буенча предприятие төзү проекты каралды, аның турында проект җитәкчесе Евгений Абрамов сөйләде. Производствоны Чаллыда урнаштыру күздә тотыла, 15 эш урыны булдыру планлаштырыла. Инвестицияләр 116 млн.сум тәшкил итәчәк. Саклау япмасы биналар, стеналар, агачлар һ.б. фасадлары өчен кулланылырга мөмкин.
Аннары «Агрополис» агросәнәгать паркын, «Биектау» һәм «М-12.Югары Ослан» сәнәгать паркларын булдыру проектлары төркеме тәкъдим ителде. Проектлар турында «Муссон групп» ҖЧҖ генераль директоры Олеся Мещерякова сөйләде.
Аннары Казан территориясендә җәмәгать функцияләре белән ресторан комплексы төзү проекты хупланды. Проектны үсеш буенча директор Глеб Арзамасов тәкъдим итте. Ресторан урыны итеп Казансу елгасы яр буе билгеләнгән. 80 эш урыны булдыру планлаштырыла.
Аннары «Мизгел Кэмп» глэмпингында Татарстан Республикасы халкының һәм кунакларының ял итү урынын оештыру проекты хупланды. Проект Ютазы районында гамәлгә ашырылачак. Проект бюджеты – 50 млн.сум. Оештыручылар фикеренчә, проект җәй көне генә түгел, ә ел әйләнәсе дә эшли ала. Моңа М-5 трассасына якын булу ярдәм итәчәк, глэмпинг сәяхәтчеләр өчен ял итү урыны булырга мөмкин. Глэмпинг янындагы күлдә пляж бар, дип аерым билгеләп үтелде.
Моннан тыш, Чистайда «Юность» пляжын төзүнең инвестицион проекты каралды. Проектның планлаштырылган бюджеты – 15 млн.сум. Пляжны Чистай үзәгендә төзекләндерү күздә тотыла, шул исәптән пляж зонасы, ял итү өчен йортлар (10 тирәсе), прокат, спорт зонасы, кибетләр һәм кафелар булачак. Агымдагы 2024 елда пляж зонасы оештырылачак, 2025 елда модульле йортлар төзеләчәк.