Татарстан Икътисад министрлыгы 2023 елның 9 аенда илкүләм проектларны гамәлгә ашыруга йомгак ясады
Татарстан Икътисад министрлыгы 2023 елның тугыз аенда республикада илкүләм проектларны гамәлгә ашыру нәтиҗәләре турында хәбәр итте. Әйтик, Татарстанда 579 социаль әһәмиятле капиталь төзелеш һәм юл хуҗалыгы объектларын төзү һәм ремонтлау бара, җиһазлар сатып алу һәм республика учреждениеләре һәм оешмаларының матди-техник базасын яхшырту гамәлгә ашырыла. Шулай ук татарстанлылар өчен илкүләм проектлар кысаларында төрле ярдәм чаралары, социаль түләүләр алу һәм укулар үткәрү каралган.
Икътисад министрлыгы берничә илкүләм проект буенча эш башкаруны китерә. Исегезгә төшерәбез, 2023 елда Татарстан Республикасы 13 илкүләм проектның 50 региональ составын гамәлгә ашыруда катнаша.
«Мәгариф» илкүләм проекты буенча Казанда, Чаллыда, Тукай һәм Арча районнарында 9329 урынга исәпләнгән сигез яңа мәктәп төзелеше тәмамланды. Республиканың авыл мәктәпләрендә 66 «Үсеш ноктасы» үзәге һәм Зеленодольск районында «Кванториум» балалар технопаркы, Азнакай, Бөгелмә, Зәй, Зеленодольск һәм Спас районнарында сәламәтлеге буенча мөмкинлекләре чикләнгән балаларны укыту өчен уңайлы шартлар тудыру өчен биш «Доброшкола» ачылды.
Моннан тыш, илкүләм проект буенча Чүпрәле һәм Теләче районнарында ике спорт залына, Әлмәттә «Мегаполис» яшьләр үзәгенә капиталь ремонт ясалды.
«Демография» илкүләм проектын тормышка ашыру нәтиҗәсендә Казанның Яңа Савин районында 220 урынга исәпләнгән балалар бакчасы төзелеше тәмамланды, Казанның, Чаллы, Югары Ослан һәм Мамадыш районнарының 23 спорт мәктәбе өчен спорт җиһазлары, инвентарь һәм экипировка сатып алынды.
Күп кенә эшләр «Сәламәтлек саклау» илкүләм проекты кысаларында башкарылды. 21 поликлиника һәм хастаханә, 96 фельдшер-акушерлык пункты (ФАП) капиталь ремонтланды, ике поликлиника (Зеленодольск районының Осиново бистәсендә һәм Казан шәһәренең Дәрвишләр бистәсендә) һәм 27 ФАП төзелгән. Моннан тыш, алты төбәк кан тамырлары үзәге һәм Казан, Чаллы, Алабуга һәм Зеленодольскиның беренчел кан тамырлары бүлекчәләре өчен 183 берәмлек медицина җиһазы сатып алынды. Татарстанның 63 медицина оешмасына 1394 берәмлек медицина җиһазы китертелде һәм файдалануга тапшырылды.
Республикада «Торак һәм шәһәр мохите» илкүләм проекты буенча Тукай районының Белоус һәм Биклән авылларында су белән тәэмин итү челтәре, Буада тышкы инженерлык һәм юл челтәрләре төзелеше төгәлләнде.
Чаллыда М.Җәлил һәм Чаллы проспектларын тоташтыручы Мәләкәс елгасы аша күпер астында урау юл төзелеше тәмамланды. Казанда Бохара урамы буенча торак комплекс буйлап юл эшләре тәмамланган.
Республиканың Нурлат районында су алу узелы белән су белән тәэмин итү системасы төзелеше тәмамлана.
14 җәмәгать киңлеген төзекләндерү эшләре Казанда, республиканың Әгерҗе, Әлки, Әлмәт, Аксубай, Актаныш, Баулы, Югары Ослан, Зеленодольск, Кайбыч, Лениногорск, Мөслим, Сарман, Чирмешән районнарында тәмамланды.
«Мәдәният» илкүләм проекты буенча Кукмара, Балык Бистәсе һәм Биектау районнарында дүрт авыл мәдәният йорты ремонтланды, Апас һәм Кайбыч районнарында өч авыл клубы төзелеше тәмамланды, драма театры урнашачак Буа мәдәният йорты реконструкцияләнде. Моннан тыш, Арчада музейны һәм Түбән Камада Мәктәп бульвары буенча балалар музыка мәктәбен капиталь ремонтлау эшләре бетте.
«Куркынычсыз сыйфатлы юллар» илкүләм проекты буенча 131 юл хуҗалыгы объекты капиталь ремонтланды, 56 объектта эшне агымдагы ел ахырына кадәр тәмамлау планлаштырыла.
«Экология» илкүләм проекты ярдәмендә Мамадыш районының Кама урман хуҗалыгы авылында Бөрсет елгасы үзәнен чистарту эшләре төгәлләнә.
Илкүләм проектлар илдә РФ Президенты Владимир Путин инициативасы һәм йөкләмәсе буенча гамәлгә ашырыла.