Мидхәт Шаһиәхмәтов Татарстанның иң яхшы Территориаль иҗтимагый үзидарәләрен бүләкләде
Бүген Казан Ратушасының колонналар залында 2022 ел йомгаклары буенча ел саен үткәрелә торган «Иң яхшы территориаль иҗтимагый үзидарә» республика бәйгесендә җиңүчеләрне хөрмәтләү тантанасы узды. Татарстан Республикасы шәһәр Территориаль иҗтимагый үзидарәләре гомуми суммасы 73 млн сумга кадәр грантлар алачак.
Бүләкләү алдыннан Татарстан Республикасы Премьер-министры урынбасары – Татарстан Республикасы икътисад министры Мидхәт Шаһиәхмәтов Татарстан Республикасы Рәисе исеменнән һәм шәхсән үз исеменнән җиңүчеләрне котлады һәм территориаль иҗтимагый үзидарәләрнең барлык активистларына үз территорияләрен үстерүгә, җирле гражданнарның тормыш сыйфатын күтәрүгә зур өлеш керткәннәре өчен рәхмәт белдерде.
Министр искә төшергәнчә, хәзерге вакытта Татарстанда 459 Территориаль иҗтимагый үзидарә эшли. Республиканың территориаль иҗтимагый үзидарәләре урыннарда киң социаль эш алып баралар, гражданнарны иҗтимагый тормышта катнашуга җәлеп итәләр, җирле халыкның инициативаларын хуплыйлар, территорияләрнең көнүзәк мәсьәләләрен ачыклыйлар һәм хәл итәләр, мәдәни-массакүләм, физкультура-сәламәтләндерү һәм спорт чаралары оештыралар, халыкның социаль яктан зәгыйфь категорияләренә ярдәм итәләр.
«Территориаль иҗтимагый үзидарәләр – бүген әһәмиятле иҗтимагый көчләрнең берсе, ул безнең шәһәрләрнең, урамнарның һәм ишегалларының тышкы кыяфәте белән бәйле үзгәртеп коруларны башлап җибәрүче һәм турыдан-туры башкаручы булып тора. Үзенең эшчәнлеге елларында Территориаль иҗтимагый үзидарәләре җирле социаль активлык һәм инициатива үзәкләренә әверелде. Моннан тыш, алар хакимият органнарының таянычы, республика һәм федераль программаларны гамәлгә ашыруда аларның ярдәмчесе булып тора», – дип билгеләп үтте министр.
Министр ассызыклаганча, республикада территориаль иҗтимагый үзидарә институтын үстерү мәсьәләләренә аерым игътибар бирелә. Татарстанда төзелгән территориаль иҗтимагый үзидарәләр җирле үзидарә һәм дәүләт хакимияте органнары белән үзара хезмәттәшлек системасы, республикада кабул ителгән территориаль иҗтимагый үзидарәләргә ярдәм итү формалары бүген Россия Федерациясенең күп кенә субъектлары өчен үрнәк булып тора.
«Киләчәктәге уртак эшебез дә нәтиҗәле булыр һәм безнең гражданнар файдасына юнәлдерелгән барлык конструктив инициативаларны тормышка ашырырга мөмкинлек бирер дип өметләнәм», – дип нәтиҗә ясады министр.
Исегезгә төшерәбез: бәйге «Татарстан Республикасы муниципаль берәмлекләр Советы» Ассоциациясе ярдәме белән 2015 елдан бирле үткәрелә.