Татарстан бизнесы илкүләм проект буенча хезмәтләр һәм ярдәм чаралары алу өчен электрон рәвештә илнең башка эшкуарларына караганда ешрак мөрәҗәгать иткән
РФ.КУЭ Цифрлы платформасы сервислары һәм продуктларыннан беренче елда 1,8 млн тапкырдан артык файдаланганнар. Шул ук вакытта Платформада хезмәт күрсәтүгә һәм ярдәм чараларына Татарстан эшкуарларыннан 13 мең гариза килгән. Республика Цифрлы платформа аша бирелгән гаризаларны кабул итү һәм эшкәртү буенча илдә алдынгы булды.
РФ.КУЭның Цифрлы платформасы эшләүнең беренче елында анда 320 меңнән артык кулланучы теркәлгән. Алар кече һәм урта эшкуарлык субъектлары, үзмәшгульләр һәм үз бизнесларын ачарга ниятләүче физик затлар. 190 меңнән артыгы – гамәлдәге юридик затлар һәм «Дәүләт хезмәтләре» аша верификацияләнгән шәхси эшкуарлар, тагын 47 меңнән артыгы – үзмәшгульләр. Гомумән алганда, алар сервислардан, продуктлардан һәм РФ.КУЭ контентыннан 1,8 млн тапкырдан артык файдаланган, шуларның 260 меңнән артыгы юридик яктан әһәмиятле сервисларга кагылган: ярдәм чараларына, ташламалы лизинг һәм кредит программаларына гаризалар.
«Цифрлы платформа» – «кече һәм урта эшкуарлык» илкүләм проектын тәшкил итүче федераль проектларның берсе. Аны булдыру максаты: илебездәге һәр эшкуарга аңа кирәкле ярдәм чараларыннан дистанцион рәвештә файдалану һәм, кайда булуына карамастан, махсус сервисларга керү мөмкинлеге бирү. Өстенлекле бурычларның берсе – Цифрлы платформаны бизнесның проактив ярдәмчесе генә түгел, ә эшкуарларның дәүләт белән аралашуының төп, нәтиҗәле механизмы итү», – дип ассызыклады РФ Икътисади үсеш министры Максим Решетников.
Беренче елда Цифрлы платформаның һәр кулланучысы сервислардан, шулай ук РФ КУЭда урнаштырылган төрле продуктлардан уртача 5,6 тапкыр файдаланган.
«Цифрлы платформаны эшләтеп җибәрү алдыннан зур эш этабы башкарылды, аның барышында без эшкуарлар белән бергә цифрлаштыру өчен өстенлекле хезмәтләрне билгеләдек. Иң кирәкле сервислар арасында – «Төбәк ярдәм чаралары». Аны РФ.КУЭга кертү өчен, безгә, эшкуарларга ярдәм итү өчен, Цифрлы платформаны 30 дан артык төбәк мәгълүмат системалары белән бәйләргә туры килде. Россия Федерациясенең башка субъектлары өчен шәхси кабинетлар булдырылды. Алар аша хакимият органнары һәм ярдәм инфраструктурасы хезмәткәрләре үз чараларын Цифрлы платформада урнаштыралар, эшкуарларның гаризаларын кабул итәләр һәм эшкәртәләр», – дип билгеләп үтте КУЭ Корпорациясе генераль директоры Александр Исаевич.
Бүген РФ.КУЭда төбәкләрдән 300 дән артык цифрлаштырылган продукт һәм хезмәт бирелгән, аларга ел дәвамында бизнестан 20 меңнән артык онлайн-гариза килгән. Хәзерге вакытта төбәкләрдә Цифрлы платформа аша ярдәм алу процедурасын гадиләштерү буенча эш бара. Иң күп кулланыла торган чаралар күрсәтүнең беренче биш стандарты расланган инде, алар Россия Федерациясенең барлык субъектлары өчен бердәм шартларны, срокларны һәм документлар җыелмаларын үз эченә ала. 2023 елда мондый стандартлар саны 20 гә кадәр артырга тиеш.
Бизнеста ихтыяҗ булганнар арасында шулай ук ватан һәм чит ил тәэмин итүчеләрен һәм заказчыларын берләштерә торган «Җитештерү кооперациясе һәм сату» сервисы да бар. Бер ел эчендә продукцияне сатуны оештыруда 2,5 меңнән артык компания ярдәм алды. Алар арасында Минск трактор заводы соравына җавап биргән Лениногорск механика заводы да бар. КУЭ Корпорациясе белән берлектә эш нәтиҗәсендә туктату боҗралары белән тәэмин итү турында килешү имзалана. Продукциянең сынау партиясе инде җитештерелгән һәм хәзер аны сынау бара.
Краснодар крае эшкуары Евгения Косова, РФ.КУЭда теркәлгәннән соң, «Метро» сәүдә челтәре белән тәэмин итү килешүе төзегән, шулай ук үз төбәгендә «Фермер утраучыгы» проектын гамәлгә ашыра башлаган.
2022 ел ахырында РФ.КУЭда контрагентларны тикшерү буенча сервис барлыкка килде. Аны 15 меңнән артык эшкуар кулланган. Декабрьдә эшләтеп җибәрелгән Эшкуарның цифрлы профиле, сервисларга керүне дә, ярдәм һәм хезмәтләр алу процедураларын да гадиләштереп, кече һәм урта бизнес мөмкинлекләрен тагын да киңәйтә. Аны 3,5 меңгә якын компания оештырган.
Исегезгә төшерәбез, кече һәм урта бизнес өчен Цифрлы платформа КУЭ Корпорациясе һәм Икътисади үсеш министрлыгы белән берлектә эшләнгән. РФ.КУЭ кулланучыларына сервислар һәм хезмәтләр 2022 елның февралендә ачылды. Платформаны булдыру һәм үстерү гамәлгә ашыру белән беренче вице-премьер Андрей Белоусов җитәкчелек итә торган «Кече һәм урта эшкуарлык һәм эшкуарлык инициативасына ярдәм итү» илкүләм проектында каралган.
КУЭ Корпорациясе – кече һәм урта эшкуарлыкны үстерү институты. Ул бизнеска кредит бирү өчен поручительлекләр һәм гарантияләр бирә, эре заказчыларның сатып алуларына керү мөмкинлеген тәэмин итә һәм ритейлер киштәләренә эләгергә ярдәм итә. Корпорация шулай ук Федераль инновацион үсеш институты булып тора, югары технологияле инновацион КУЭ субъектларына ярдәм күрсәтә. КУЭ корпорациясе шулай ук КУЭ Банкы һәм краудинвестинг платформалары аша финанс ярдәме күрсәтә, эшкуарлык компетенцияләренә укыту үткәрә һәм бизнесны акселерацияләү буенча программаларны гамәлгә ашыра. «МИР» ИК аша компанияләрне үсеш һәм тернәкләнү стадиясендә финанслый.