Икътисад министрлыгында илкүләм проектларны гамәлгә ашыру һәм ярдәм чаралары турында сөйләделәр
Икътисадның тотрыклы үсешен тәэмин итү буенча видеоконференция режимында эшче төркем утырышы узды, анда министрлыклар, ведомстволар, федераль хакимият органнарының территориаль органнары, муниципаль берәмлекләр оешмалары вәкилләре катнашты.
Эшче төркем утырышы кысаларында 2023 елның гыйнварында сәнәгать җитештерүе мәсьәләләре буенча республиканың икътисад тармаклары һәм муниципаль берәмлекләре буенча фикер алыштылар. Тармак министрлыкларына, муниципаль берәмлекләргә йөкләмә бирелде:
- һәр предприятие киселешендә сәнәгать җитештерүенең кимү сәбәпләрен җентекләп анализларга;
- предприятиеләрнең проблемалы мәсьәләләрен оператив һәм вакытында хәл итү өчен, баланс комиссияләре эшен активлаштырырга, шулай ук, булган федераль ярдәм чараларын максималь файдаланып, мөмкин булган куркынычларны көйләү, юк итү;
- салымнар һәм җыемнар буенча бурычлар артуга юл куймау кысаларында предприятиеләр белән берлектә эшне алданрак алып барырга, предприятиеләрнең проблемалы мәсьәләләренә оператив рәвештә җавап бирергә, мәгълүматны вакытында җиткерергә һәм Татарстан Республикасы икътисадының тотрыклы үсешен тәэмин итү буенча эшче төркем утырышларында карау өчен тәкъдимнәр әзерләргә;
- предприятиеләрнең ярдәм чараларында катнашу мәсьәләләрен контрольдә тотарга, алардан файдаланганда предприятиеләрдә килеп туган проблемалы мәсьәләләргә оператив рәвештә җавап бирергә.
Киңәшмәнең төп темалары шулай ук бердәм салым хисабы мәсьәләләре, кече һәм микробизнес өчен Россия Саклык банкы карарлары, «Хезмәт җитештерүчәнлеге» илкүләм проектын гамәлгә ашыру һәм Татарстанда милли проектларны медиа яктырту булды.
2023 елда барлык салым түләүчеләргә Бердәм салым хисабы (ЕНС) ачылды. Федераль салым хезмәтенең Татарстан Республикасы буенча идарәсе вәкиле яңа система кертелү белән бәйле мәсьәләләрне аңлатты. Бу исәпләнгән һәм түләнгән салымнарны һәм кертемнәрне исәпкә алуның яңа ысулы. Бердәм салым хисабы салым түләү вакытына кадәр бердәм салым түләү ярдәмендә тулылана. Кергән сумма салым түләүченең йөкләмәләре арасында бүленә.
Предприятиеләрнең өзлексез эшләвен тәэмин итүдә кредит оешмаларын ташламалы финанслау программалары төп роль уйнавы билгеләп үтелде. Эшче төркем утырышы кысаларында Россия Саклык банкының «Татарстан Банкы» бүлекчәсе вәкиле бизнеска актуаль ярдәм чаралары турында хәбәр итте.
Утырышта шулай ук, предприятиеләрнең өзлексез эшләвен тәэмин итүдә мөһим резерв булып, аларның эшчәнлегенең нәтиҗәлелеген арттыру торуы, моңа «Хезмәт җитештерүчәнлеге» илкүләм проектын гамәлгә ашыру ярдәмендә ирешелүе дә билгеләп үтелде. Илкүләм проектны гамәлгә ашыру барышы, шул исәптән 2022 ел нәтиҗәләре һәм 2023 елга бурычлар турында Татарстан Республикасы Энергия ресурсларының нәтиҗәле технологияләре үзәге директоры Марат Әхмәров сөйләде.
Тармак министрлыкларына, муниципаль берәмлекләргә «Хезмәт җитештерүчәнлеге» илкүләм проектын гамәлгә ашыруга кертү буенча предприятиеләргә максималь ярдәм күрсәтергә кирәк. Проектта катнашу предприятиеләрнең иң яхшы тәҗрибәсен кулланырга, шулай ук илкүләм проектта каралган ярдәм чараларында катнашырга мөмкинлек бирә.
2023 елда Татарстан Республикасында социаль-икътисади тотрыклылыкны тәэмин итү һәм икътисадны үстерү буенча чаралар планының мөһим юнәлеше булып, илкүләм проектларны һәм дәүләт программаларын нәтиҗәле гамәлгә ашыруны дәвам итү тора.
Федераль үзәк контролендә булган төп мәсьәләләрнең берсе – илкүләм проектларны медиа яктырту. Утырышта илкүләм проектларны гамәлгә ашыруны мәгълүмати тәэмин итү буенча эшне көчәйтү кирәклеген билгеләп үттеләр.
«Игътибарыгызны тагын бер тапкыр шуңа юнәлтәм: илкүләм проектларны яктырту темасы бик мөһим, чөнки әлеге тема буенча мәгълүмат азрак булган саен, безнең гражданнарга илкүләм проектларны гамәлгә ашыру нәтиҗәсе дә сизелми диярлек», – дип хәбәр итте Татарстан Республикасы икътисад министры урынбасары Гүзәл Насыйбуллина.