Мидхәт Шаһиәхмәтов Питрәч районы советының йомгаклау сессиясендә катнашты
22 февральдә Питрәч районында Питрәч муниципаль районы советының дүртенче чакырылыш 30 нчы утырышы узды, аның кысаларында 2022 елда социаль-икътисади үсеш йомгаклары каралды, һәм 2023 елга бурычлар билгеләнде. Чарада Татарстан Республикасы Премьер-министры урынбасары – Татарстан Республикасы икътисад министры Мидхәт Шаһиәхмәтов катнашты.
Мидхәт Шаһиәхмәтов республиканың 2022 елдагы социаль-икътисади күрсәткечләре турында мәгълүмат бирде һәм район икътисадында эшләрнең торышы турында сөйләде. Республика муниципаль берәмлекләренең 2022 ел өчен социаль-икътисади үсеше рейтингында район 10 нчы урында. 2022 елда Питрәч районының тулай төбәк продукты күләме 22 млрд сум чамасы бәяләнә.
Район үсешенә авыл хуҗалыгы тармагы мөһим өлеш кертә, ул икътисад структурасында 25,3 % тәшкил итә. 2022 елда авыл хуҗалыгы продукциясенең тулаем күләме 11,3 % ка арткан. Икътисад министры билгеләп үткәнчә, Питрәч районы Татарстан Республикасы агросәнәгать комплексының йомгаклау рейтингында 15 нче урында.
Район икътисады структурасында сәнәгать 11,9 % ны алып тора. 2022 ел нәтиҗәләре буенча сәнәгать җитештерү индексы 103,4 % тәшкил итә. Үзләрендә җитештерелгән 5 млрд сумлык товар төяп җибәрелгән.
Быел районга яңа инвестицияләр дә җәлеп ителгән: «Званка» сәнәгать паркы, 12 эш урынлык коворкинг, 2 автоягулык салу станциясе ачылган. Колай авылында асфальт-бетон заводы төзелә. Кощаковода тиздән төзелеш материаллары һәм инструментлар, склад бүлмәләре җитештерә башлаячаклар.
«Тулаем алганда, район сәнәгате үсешендә уңай динамика күзәтелә, ярдәм чараларының бөтен комплексын максималь рәвештә җәлеп итеп, алга таба да икътисадны һәм сәнәгатьтә яңа юнәлешләрне үстерергә кирәк», – диде министр.
Мидхәт Шаһиәхмәтов шулай ук муниципаль берәмлекләрнең балансланган үсешен агломерация алымын исәпкә алмыйча карарга ярамый, дип хәбәр итте. Район Казан агломерациясенең бер өлеше булып тора, һәм аның географик урыны файдалы. Биредә торак төзелеше югары темплар белән бара, һәм халык саны арта. Өстенлекләр белән бергә агломерация процессларына хас булган шәһәр яны районы проблемалары да хас.
Җирле үзидарә органнарының өстенлекле бурычларының берсе – кече һәм урта бизнеска ярдәм итү. Тулаем алганда районда кече һәм урта эшкуарлык эшчәнлеге күрсәткечләре буенча уңай динамика күзәтелә: КУЭ өлкәсендә эшләүчеләр саны буенча район 13 нче урында, КУЭ субъектлары саны буенча 7 нче урында.
«Районга, республикада булган барлык дәүләт ярдәме чараларыннан файдаланып, сәнәгать паркларын булдыру механизмы аша территорияләрне үстерүне дәвам итәргә кирәк», – дип хәбәр итте министр.
Мидхәт Шаһиәхмәтов 2023 елга төп бурычны да билгеләде. Бу – тулаем төбәк продуктын арттыру.