2022 елда Татарстанда илкүләм проектларны гамәлгә ашыруга 36,1 млрд сум каралган
Татарстан Республикасы Икътисад министрлыгы 2022 елның 9 аенда республикада илкүләм проектларны тормышка ашыру нәтиҗәләре турында сөйләде. Татарстанда 216 социаль әһәмиятле капиталь төзелеш һәм юл хуҗалыгы объекты төзелә һәм ремонтлана, җиһазлар сатып алына һәм республика учреждениеләре һәм оешмаларының матди-техник базасы яхшыртыла. Шулай ук татарстанлылар өчен илкүләм проектлар кысаларында төрле ярдәм чаралары каралган, социаль түләүләр алу һәм укулар уздыру каралган.
«Спорт – тормыш нормасы» төбәк проектын гамәлгә ашыру кысаларында «Демография» илкүләм проекты буенча:
- Алексеевск муниципаль районында ясалма бозлы ябык шугалак төзелеше тәмамланды, ел азагына ачылышы планлаштырылган;
- Казанда, Чаллыда һәм Югары Ослан районында урнашкан 18 олимпия резервы мәктәбе өчен спорт җиһазлары, инвентарь һәм экипировка сатып алынды;
«Мәгариф» илкүләм проекты буенча Апас һәм Баулы муниципаль районнарында ике спорт залына капиталь ремонт тәмамланды.
Республиканың муниципаль районнарында «Сәламәтлек саклау» илкүләм проекты буенча 15 сырхауханә капиталь төзекләндерелде һәм 30 фельдшер-акушерлык пункты төзелде.
Ел ахырына кадәр Питрәч районының Көек авылында, Зеленодольск районының Осиново авылында, Әлмәт районында һәм Казан шәһәренең Дәрвишләр бистәсендә табиб амбулаторияләре һәм поликлиникалар төзү эшләре тәмамланачак.
«Торак һәм шәһәр тирәлеге» илкүләм проекты буенча «Чиста су» төбәк проекты кысаларында Нурлат муниципаль районында су белән тәэмин итү системасы төзелеше тәмамланып килә.
24 иҗтимагый киңлекне төзекләндерү эшләре республиканың Әгерҗе, Әлмәт, Азнакай, Аксубай, Арча, Актаныш, Баулы, Бөгелмә, Кукмара, Лениногорск, Мамадыш, Минзәлә, Мөслим, Түбән Кама, Нурлат, Питрәч, Саба, Теләче, Сарман, Чистай, Чирмешән районнарында тәмамланган. Ел ахырына шәһәр тирәлегенең тагын 9 объектында эшләр тәмамланачак.
«Мәдәният» илкүләм проекты буенча:
- Алабуга һәм Зеленодольск шәһәрләрендә ике яңа мәдәни үсеш үзәге ачылды;
- Кукмара муниципаль районының Ядегәр һәм Байлангар авылларында 2 авыл мәдәният йорты ремонтланды;
- Чүпрәле районының Иске Задур авылында күп функцияле үзәк һәм Баулы муниципаль районының Уба авылында мәдәният йорты төзелеше тәмамланды.
- Арча районының Штерә авылында һәм Яшел Үзән районының Октябрь бистәсендә ике авыл мәдәният йорты һәм Мамадыш муниципаль районының Катмыш авылында мәдәни-ял итү үзәге төзелеше дәвам итә.
- Ел ахырына Лаеш шәһәрендә музейны капиталь төзекләндерү һәм Түбән Кама шәһәрендә Яшь тамашачы театрын реконструкцияләү эшләрен төгәлләү планлаштырыла.
«Экология» илкүләм проекты ярдәмендә Лаег районында Никольское авылындагы Мишә елгасының уң як кушылдыгын һәм Державино авылындагы буаны чистарту эшләре төгәлләнде. Шулай ук Мамадыш шәһәрендә Нократ елгасының уң як кушылдыгын чистарту тәмамланып килә.
Исегезгә төшерәбез: 2022 елда Татарстан Республикасы 13 илкүләм проектның 49 төбәк проектын гамәлгә ашыруда катнаша, быел аларны гамәлгә ашыруга 36,1 млрд сум каралган.