Татарстан Якутиядә импортны алмаштыру өчен агрегатор тәкъдим итте
Россия Инновация төбәкләре ассоциациясе (АИРР) утырышы кысаларында Татарстан Республикасының «Импортны алмаштыру үзәге» мөмкинлекләрен тәкъдир итү узды, аны Татарстан Республикасы Президенты Рөстәм Миңнеханов Якутскида уздырды. Чара Татарстан Республикасы Президенты Р.Н. Миңнеханов җитәкчелегендәге Татарстан Республикасы делегациясенең Саха (Якутия) Республикасына эшлекле визиты кысаларында узды. Делегация составында шулай ук Татарстан Республикасы Премьер-министры урынбасары – Татарстан Республикасы икътисад министры Мидхәт Шаһиәхмәтов та бар иде.
Видеоэлемтә буенча АИРР утырышында Россия Федерациясе Хөкүмәте Рәисе урынбасары Марат Хөснуллин катнашты.
Хәзер Ассоциациягә илнең 18 субъекты керә, алар өлешенә Россия инновация продукциясенең өчтән бер өлеше туры килә. Соңгы 4 елда АИРР га 4 яңа төбәк (Новгород өлкәсе, Саха Республикасы (Якутия), Түбән Новгород өлкәсе, Ханты-Манси АО - Югра) кушылды.
Утырышта катнашучылар идарәче карарлар кабул итү өчен «ГеоВЭБ» системасы мөмкинлекләре турында ВЭБ.РФ докладын тыңладылар.
Татарстан Республикасы Дәүләт заказы агентлыгы импортны алмаштыруны үстерү өчен агрегатор тәкъдим итте. Ул илнең 6 төбәгендә (Татарстан, Дагыстан, Мордовия, Удмуртия, Әстерхан, Свердловск өлкәләрендә) гамәлгә кертелгән инде.
Яңа механизм илдә җитештерелә торган импортны алмаштыра торган продукция турында мәгълүмат җыюны гамәлгә ашырырга, эшчәнлеге чит ил комплектлау әйберләре, товарлар, чимал һәм җиһазлар кертүгә бәйле булган заказчыларга ярдәм күрсәтергә мөмкинлек бирә.
Шулай ук делегация әгъзалары «Татарстан – Якутия» форумында катнаштылар. Форумда ике республиканың инвестиция һәм инновация потенциалын тәкъдир иттеләр.
Татарстан башлыгы төбәкара хезмәттәшлекнең мөһимлеген билгеләп үтте. Форум кысаларында Якутия һәм Татарстан арасында килешүләр имзаланды.