МСП.РФ да эшкуар өчен «Цифрлы профиль»не июль аенда эшләтеп җибәрергә планлаштыралар

КУЭ Корпорациясе һәм икътисади үсеш министрлыгы белән берлектә эшләнгән РФ КУЭ ның Цифрлы платформасын үстерүнең төп этабы булып 2022 елның июлендә эшкуар өчен «Цифрлы профиль»не эшләтеп җибәрү торачак. Бу ярдәм чараларына тиз арада керү мөмкинлеген тәэмин итәргә мөмкинлек бирәчәк. Бу хакта Россия Икътисади үсеш министрлыгында пәнҗешәмбе көнне төбәкләр белән узган киңәшмәдә хәбәр иттеләр.

Проектның асылы – хезмәт күрсәтүне сорап мөрәҗәгать иткәндә бизнес хуҗаларын кирәкле мәгълүматларны мөстәкыйль рәвештә тапшырудан азат итү. Аларга мәгълүматлар алырга ризалык бирү дә җитә, Цифрлы платформа контрагентлардан (ФСХ, Цифрлы үсеш министрлыгы, Икътисад министрлыгы, ҮБ, КУЭ Корпорациясе) барлык мәгълүматны цифрлы профиль аша кабул итәчәк.

МСП.РФ да цифрлы профиль:

• «катлаулы» финанс ярдәме чаралары алуда ярдәм итәчәк. Кредитка кулдан тутырыла торган кырлар саны ике тапкырга кимиячәк. Моңа өстәп, барлык мәгълүматлар верификацияләнгән булачак һәм тикшерү таләп ителмәячәк;
• 2 шартны – ЕСИА аша МСП.РФ да теркәлү һәм эшкуарның ризалыгы булу – үтәгәндә, эшкуар турындагы 18 белешмәгә керү мөмкинлеген тәэмин итәчәк;
• КУЭ Корпорациясе ярдәм күрсәтү процессларын яңадан караячак. 2022 елның 1 сентябренә МСП.РФ да күпчелек финанс чараларын, шул исәптән региональ чараларны алуга гариза гадиләштереләчәк.

«Бу инструмент финанс ярдәме күрсәткәндә бигрәк тә нәтиҗәле булыр, дип көтәбез, чөнки бизнестан күп мәгълүмат сорала һәм белешмәләр җыю бер атнага сузылырга мөмкин», – дип хәбәр итте Россия Икътисади үсеш министры Максим Решетников.

Хәзерге вакытта эшкуарлар һәм үзмәшгульләр өчен МСП.РФ ның Цифрлы платформасында онлайн форматта 100 дән артык бизнеска ярдәм итү чарасы бар, аларның 37 се Татарстан Республикасы ярдәменең цифрлаштырылган чаралары. Алар арасында: күргәзмәләрдә һәм ярминкәләрдә катнашу өчен гариза бирү, бухгалтерия, продукцияне сертификацияләү, товарларны һ. б. ларны танытуда ярдәм алу мөмкинлеге.