РФ Хөкүмәте эшсез гражданнарны эшкә урнаштырганда субсидияләү программасын башлап җибәрә
ТР Икътисад министрлыгында Икътисадның тотрыклы үсешен тәэмин итү буенча чаралар планын гамәлгә ашыру буенча эшче төркем утырышы узды. Республиканың башкарма хакимият органнары һәм муниципаль берәмлекләре вәкилләреннән төзелгән эшче төркем әгъзалары эшсез гражданнарны эшкә урнаштырганда эш бирүчеләргә субсидия бирү һәм шикәр һәм көнбагыш маена бәяләрне тотрыклыландыру чаралары турында фикер алышты.
Аерым алганда, Россия Федерациясе Хөкүмәтенең 2021 елның 13 мартындагы 362 номерлы карары турында сүз бара, аның нигезендә дәге эш бирүчеләр эшсез гражданнарны эшкә урнаштыру өчен субсидия ала алачак. Эш бирүче 2021 елның 1 гыйнварына кадәр мәшгульлек үзәкләрендә теркәлгән гражданнарны эшкә урнаштырганда дәүләт ярдәме ала алачак.
Субсидия район коэффициентына, иминият кертемнәренә һәм эшкә урнашкан гражданнар санына арттырылган өч минималь хезмәт хакы күләменә тигез булачак. Шул ук вакытта оешма беренче түләүне эшсез кешене эшкә алганнан соң – бер ай узгач, икенчесен – өч айдан соң, өченчесен алты айдан соң алачак. Ярдәм күрсәтү кагыйдәләре турында тулырак мәгълүмат Россия Федерациясе Хөкүмәтенең 2021 елның 13 мартындагы 362 номерлы карарында күрсәтелгән.
Шулай ук, билгеләп үтелгәнчә, агымдагы атнада федераль дәрәҗәдә шикәр һәм көнбагыш маена бәяләрне тотрыклыландыру буенча өстәмә чаралар турында карар кабул ителгән.
Гражданнар өчен кулай дәрәҗәдә ваклап сату бәяләрен алга таба саклап калу максатларында, Россиянең Монополиягә каршы федераль хезмәте, Авыл хуҗалыгы министрлыгы һәм Россия Федерациясе Сәнәгать һәм сәүдә министрлыгы, ак шикәргә – ике айга, көнбагыш маена – 2021 елның октябренә кадәр бәяләрне киметү һәм саклап калу турындагы килешүләрне озынайту өчен бизнес белән оператив консультацияләр үткәрәчәк. Гамәлдәге килешүләрдә предприятиеләрнең ак шикәргә җибәрү бәясе – 1 кг өчен 36 сум, ваклап сату бәясе – 1 кг өчен 46 сум, көнбагыш мае өчен 95 һәм 110 сум тәшкил итә.
Утырышта шулай ук республика предприятиеләре һәм оешмаларының «ФОТ 3.0» программасында катнашуына үз вакытында мониторинг үткәрү кирәклеге дә билгеләп үтелде.