Татарстанда 2020 ел нәтиҗәләре буенча иң яхшы экспортерларны сайладылар

Бүген Эшкуар йортында 2020 ел нәтиҗәләре буенча Татарстанның иң яхшы экспортерларын бүләкләделәр. Кече һәм урта бизнес вәкилләре арасыннан 5 номинациядә җиңүчеләр ел саен үткәрелә торган «Ел экспортеры» конкурсы кысаларында билгеләнде.

Россиядә экспорт эшчәнлеге тотрыклы һәм икътисадый үсешне үстерүнең төп факторларының берсе буларак карала. Җыелма экспорт үсешенә, шул исәптән кече һәм урта предприятиеләрнең тышкы базарларга чыгуына да йогынты ясый.

Узган ел дәвамында тотрыксыз вәзгыять һәм билгесезлек саклануга карамастан, Россия компанияләренең экспорт активлыгы шактый югары иде, ә эшчәнлекне алып бару өчен шартлар тудыру һәм әлеге категория эшкуарларга аларның экспорт өлгерешенең төрле стадияләрендә ярдәм итү федераль дәрәҗәдә дә, республика дәрәҗәсендә дә илкүләм проектларны гамәлгә ашыруга кертелде.

Конкурс «Кече һәм урта эшкуарлык һәм шәхси эшкуарлык инициативасына ярдәм» илкүләм проекты кысаларында инде 4 ел рәттән уздырыла. Конкурс республиканың КУЭ субъектлары арасында экспорт эшчәнлеге лидерларын ачыклауга һәм тышкы икътисадый эшчәнлек буенча иң яхшы тәҗрибәне һәм практиканы алга этәрүгә юнәлдерелгән. Бу экспорт юнәлешле предприятиеләр өчен уникаль этәргеч, үз потенциалыңны ачу һәм тормышка ашыру мөмкинлеге.

2020 ел нәтиҗәләре буенча җиңүчеләр 5 номинациядә билгеләнде:

- Сәнәгать өлкәсендә иң яхшы экспортер-предприятие – «Теко – Торговый дом» ҖЧҖ. Предприятие куркынычсызлык системалары өчен җиһазлар эшләү, җитештерү һәм тәэмин итү белән шөгыльләнә;

- Хезмәт күрсәтү өлкәсендә иң яхшы экспортер-предприятие – «Хортум» фәнни-җитештерү предприятиесе ҖЧҖ – Татарстан заводы – сильфонлы компенсаторлар, әзер металл эшләнмәләр җитештерүче;

- Агросәнәгать комплексы өлкәсендә иң яхшы экспортер-предприятие – «Элит» ҖЧҖ. Экспортер ашлык, тәмәке, авыл хуҗалыгы терлекләре өчен орлыклар һәм азык белән күпләп сату буенча махсуслаша;

- Югары технологияләр өлкәсендә иң яхшы экспортер-предприятие – «Эйдос-Медицина» ҖЧҖ. Предприятие фәнни-тикшеренү эшчәнлеге алып бара, табигый һәм техник фәннәр өлкәсендә кирәкле әйберләр эшләп чыгару белән шөгыльләнә;

– Ел ачышы – «АртВэй» ҖЧҖ. Экспортер логистика һәм таможня рәсмиләштерүе өлкәсендә хезмәт күрсәтә.

Җиңүчеләргә дипломнар һәм истәлекле статуэткалар тапшырылды. Моннан тыш, аларга конкурс эмблемасын продукциянең һәм күрсәтелә торган хезмәтләрнең югары сыйфатын раслый торган күрсәткеч буларак куллану хокукы да бирелә. Шулай ук барлык җиңүчеләр дә экспортерларга яңа тышкы икътисадый элемтәләр урнаштырырга ярдәм итәчәк эшлекле инглиз теленә өйрәтү өчен сертификатлар алдылар.

Конкурс «Татарстан Республикасы Эшкуарлыкка ярдәм фонды» коммерциясез микрокредит компаниясе тарафыннан, Татарстан Республикасы Икътисад министрлыгы ярдәме белән, «Татарстан Республикасы Сәүдә-сәнәгать палатасы» берлеге белән берлектә үткәрелә.