ТР Икътисад министрлыгында булып узган түгәрәк өстәл артында Татарстанда интеллектуаль милек базарын үстерү программасын гамәлгә ашыру турында фикер алыштылар

Татарстан Республикасы Икътисад министрлыгында видеоконференцэлемтә режимында «Интеллектуаль милек аша инновацияләргә. Татарстан Республикасында интеллектуаль милек базарын үстерү программасын гамәлгә ашыру нәтиҗәләре» темасына түгәрәк өстәл утырышы булып узды. Анда ТР Икътисад министрлыгы, Татарстан фәнни-тикшеренү үзәге, инновацияле компанияләр вәкилләре катнашты.

Инвестиция һәм инновацияле эшчәнлек идарәсе башлыгы Динар Шакиров билгеләп үткәнчә, республика Икътисад министрлыгы Россия Федерациясе Икътисадый үсеш министрлыгы һәм Интеллектуаль милек буенча федераль хезмәт белән актив хезмәттәшлек итә. 2016 елдан Татарстан Республикасында интеллектуаль милек базарын үстерү буенча дәүләт программасы гамәлгә ашырыла.

Программаны гамәлгә ашыру кысаларында 2016-2020 елларда республика предприятиеләрендә интеллектуаль милек белән идарә итү системасына аудит үткәрелгән һәм кертелгән. Уздырыла торган чаралар интеллектуаль эшчәнлек нәтиҗәләрен ачыклауга һәм катнашучы компанияләрнең җитештерү эшчәнлеген камилләштерүнең мөмкин булган юнәлешләрен билгеләүгә ярдәм иткән.

2017 елдан башлап, ел саен, предприятиеләрнең ихтыяҗларын исәпкә алып, 100 белгеч, илебездәге иң яхшы тәҗрибәләр һәм чит ил тәҗрибәсе нигезендә, интеллектуаль милек белән идарә итү өлкәсендә өстәмә белем алган.

Шулай ук, 2020 елда, тышкы базарларга продукция җибәргәндә республика оешмаларының мәнфәгатьләрен яклау максатларында, 11 предприятие һәм оешмага Patent Cooperation Treaty (PCT) процедурасы буенча халыкара гаризаларны алга этәрү буенча хезмәт күрсәтелгән.

Цифрлы инициативаларны үстерү өлешендә Икътисад министрлыгы һәм «Татарстан фәнни-тикшеренү институты» ДУП тарафыннан инноваторлар һәм уйлап табучылар өчен «бердәм тәрәзә» булырга тиешле «ТатПатент» мәгълүмат мәйданчыгы булдырылды. Ул интеллектуаль милек объектларын теркәү, инновацияле бизнеска ярдәм итү чаралары буенча консультацияләр алырга, шулай ук Фәнни-техник өлкәдә предприятиеләрнең кече формаларын үстерүгә ярдәм фондыннан грантлар алуга гаризалар формалаштырырга мөмкинлек бирә. Үз идеяләрен тормышка ашыру һәм алга этәрү өчен барлык актуаль ярдәм чаралары да шунда ук тупланган.

Спикерларның чыгышларында инноваторларга һәм бизнеска ярдәм итү инструментлары, алга таба үсеш һәм интеллектуаль үсеш программасын модернизацияләү мәсьәләләре тәкъдим ителде. Ачык дискуссия форматында аеруча актуаль мәсьәләләр каралды.