ТР Икътисад министрлыгында узган киңәшмәдә муниципалитетлар оешмаларының финанс тотрыклылыгы һәм контроль-күзәтчелек эшчәнлеге турында сөйләштеләр
Узган атнада видеоконференцэлемтә режимында Республика икътисадының тотрыклы үсешен тәэмин итү буенча чаралар планын гамәлгә ашыру буенча эшче төркемнең традицион утырышлары узды. Киңәшмәләр муниципалитетларның финанс тотрыклылыгын тәэмин итү, контроль-күзәтчелек эшчәнлеге өлкәсендә законнар нигезендә җайга салу үзгәрешләренә, шулай ук федераль дәрәҗәдә ярдәм итүнең яңа чараларына багышланган иде.
Россия Федерациясе Хөкүмәтенең 2020 елның 29 сентябрендәге 1563 номерлы карары нигезендә, үзмәшгуль гражданнар «Кече һәм урта эшкуарлык һәм шәхси эшкуарлык инициативасына ярдәм» илкүләм проектында каралган ярдәм чараларыннан файдалана алачак. Инде бүгеннән үк Татарстандагы үзмәшгульләре «Минем бизнес» үзәге һәм «Сыналган бизнес» интернет-ресурсы белгечләреннән мәгълүмати-консультацион ярдәм алырга мөмкин. Иминият кертемнәрен түләү, кушымтадан файдалану һәм алыш-биреш буенча чек бирү, юридик затлар һәм шәхси эшкуарлар белән килешү төзү механизмнарына бәйле мәсьәләләрдә консультация сорап мөрәҗәгать итәргә мөмкин. Моннан тыш, республикадагы үзмәшгульләр өчен бизнес алып бару буенча семинарлар үткәрелә, алар өчен республика биржа мәйданыннан файдалану мөмкинлеге ачыла.
Үз чиратында, республика аграрийлары өчен Россия Федерациясе Хөкүмәтенең 2020 елның 3 октябрендәге 1594 номерлы карары белән агробизнес оештыру һәм аны үстерү өчен бушлай грантлар куллану мөмкинлеге озайтылган. Карар авыл хуҗалыгы җитештерүчеләренә акчаларны үз вакытында үзләштергән өчен штраф булдырмаска мөмкинлек бирәчәк. Мондый ташламалардан гаилә фермалары, авыл хуҗалыгы кооперативлары, шулай ук үз эшен башларга ниятләгән кешеләр файдалана алачак.
Моннан тыш, 2021 елның 7 гыйнварына кадәр кредиторларның гаризалары буенча банкротлык турында эшләр кузгатуга мораторий вакыты да озайтыла. Карар иң нык зыян күргән тармаклардагы, шул исәптән кунакханә бизнесы, җәмәгать туклануы предприятиеләре, дәүләтнеке булмаган белем бирү учреждениеләре, көнкүреш хезмәтләре күрсәтү, азык-төлек булмаган ваклап сату өлкәсендәге компанияләргә һәм шәхси эшкуарларга кагыла.
Мораторий гамәлдә булган чорда оешмаларга һәм шәхси эшкуарларга арбитраж суды карары буенча суд нигезендә кичектереп тору мөмкинлеге биреләчәк. Ул кичектерелгән йөкләмәләрне түләү срокларын үзгәртүне, шулай ук милек түләтү буенча башкару эшчәнлеген туктатуны күздә тота.
Моннан тыш, киңәшмәләр кысаларында 8 муниципалитет буенча муниципаль берәмлекләр оешмаларының финанс тотрыклылыгын тәэмин итү буенча алып барыла торган эш турындагы докладлары тыңланды.