Авыл эшкуарларына дәүләт ярдәме чаралары турында сөйләделәр
Татарстанның Балык Бистәсе, Кама Тамагы, Әлмәт һәм Биектау районнарында эшкуарлык бергәлеге белән күчмә киңәшмәләр узды. Чараны республиканың Икътисад министрлыгы, Авыл хуҗалыгы һәм азык-төлек министрлыгы белгечләре үткәрде.
Очрашуда авыл хуҗалыгы өлкәсендге эшкуарлар кече һәм урта бизнесны үстерүгә ярдәм буенча гамәлдәге чараларны өйрәнде. "Эшкуарлар өчен финанс, мөлкәти, консультацион һәм укыту юнәлешендә ярдәм каралган. Бүген 5 миллион сумгача отышлы микрозаем алырга, ташламалы җиһаз лизингы программасында, сатып алуларда, укыту семинарларында катнашырга була", - дип хәбәр итте кече һәм урта эшкуарлык субъектларына ярдәм институтларын үстерү бүлеге мөдире урынбасары Гөлназ Ситдыйкова.
Очрашу нәтиҗәләре буенча авыл хуҗалыгы өлкәсендә яңа проектларны гамәлгә ашыру мәсьәләләре каралды.