Фәрит Габделганиев: "Икътисадта уңай динамика сакланып кала". Татарстан Россия Федерациясенең лидер төбәкләре арасында
Төп макроикътисадый күрсәткечләр буенча Татарстан янә Россия Федерациясенең лидер төбәкләре арасына керде. Агымдагы елның I кварталына йомгак ясады. Россия Федерациясе субъектлары арасында Татарстан сәнәгать җитештерүе күләме буенча - 4 нче урында, кулланышка торак тапшыру буенча - 3 нче, төзелеш буенча - 6 нчы урында.
Тулай төбәк продукты 0,7%ка артты һәм 534,1 млрд сумны тәшкил итте. Икътисадый үсешкә төп өлешне сәнәгать, авыл хуҗалыгы һәм сәүдә кертте. Сәнәгать җитештерүе индексы 2017 елның әлеге чорына карата 100,4%ны тәшкил итте, төяп озатылган продукция күләме 622,1 млрд сумлык булды.
Җитештерүдә тотрыклы уңай үсеш күзәтелә: 2017 елның I кварталына карата автотранспорт чаралары - 112,5%, машина һәм җиһаз-җайланмалар - 116,6%, азык-төлек продуктлары - 111,7%, нефть продуктлары - 105,8%, текстиль эшләнмәләре - 125,1%, кәгазь һәм кәгазь эшләнмәләр - 153,5%ка.
2017 елның I кварталына карата җиңел автомобильләр җитештерү - 55,4%ка, йөк автотранспорт чаралары җитештерү - 24,2%ка, автомобиль бензины - 48,7%ка, дизель ягулыгы - 17,1%ка, ак май һәм май пасталары ясау - 7%ка, эшкәртелгән сөт җитештерү 11%ка артты.
2017 ел белән чагыштырганда агымдагы ел башыннан бирле халыкның акча керемнәре артуы күзәтелә. 2018 елның гыйнвар-февраль йомгаклары буенча республикада халыкның җан башына исәпләнгән уртача кереме узган елның әлеге чоры белән чагыштырганда 7,3%ка артты һәм 28 115,4 сумны тәшкил итте. Реаль акча керемнәре 105,5%ны тәшкил итте.
ТР ИМ матбугат хезмәте