Эшкуарларның төрле сораулар буенча мөрәҗәгать итү активлыгы арткан

Узган 2013 нче елның беренче яртыеллыгында Татарстан эшмәкәрләреннән ТР Президенты каршындагы эшкуарлар хокукларын яклау буенча вәкаләтле вәкил адресына 59 мөрәҗәгать килеп ирешкән булса, агымдагы 2014 нче елның шушы чорында 246 мөрәҗәгать кабул ителгән. Бу хакта бүген ТР Министрлар Кабинетында узган кече һәм урта эшмәкәрлеккә ярдәм чараларына багышланган брифингта ТР Президенты каршындагы эшкуарлар хокукларын яклау буенча вәкаләтле вәкил Тимур Нагуманов хәбәр итте. Былтыр ел дәвамында килеп ирешкән 371 мөрәҗәгатьнең 37се “җинаять эшләре” категориясенә, 334е “административ эшләр” төркеменә карый. “Узган елдагы кебек, быел да, мөрәҗәгатьләрнең саллы өлешен җир һәм милек белән бәйле сораулар тәшкил итә, ул 31 процентка тәңгәл, чөнки күп кенә эшмәкәрләр еш кына бизнесын үстерү өчен күчемсез милек объекты табуда кыенлыкларга дучар була, алга таба, исемлектә тикшерүләр үткәрү, җинаять җаваплылыгына тарту, авыл хуҗалыгы тармагы мәсьәләләре белән бәйлеләре бар”, - дип белдерде Тимур Ногуманов. Эшкуарлар хокукларын яклау буенча вәкаләтле вәкил эшмәкәрләр шикаять җиткергән хакимият органнарына тукталып, аеруча башкарма комитетларга һәм муниципаль берәмлек башлыкларына карата зарларның күп булуын билгеләп үтте. Моннан тыш, эшмәкәрләр хуҗалык итүче субъектларга, хокук саклау органнарына, территориаль структураларга, министрлык һәм ведомстволарга, суд, ТР прокуратурасы органнарына да шикаятьләрен ирештерә. Мөрәҗәгатьләрне карау нәтиҗәсендә, агымдагы елның беренче яртыеллыгында 21 процент очракта эшкуарлар хокуклары торгызылган. Мөрәҗәгатьләрнең 69 процент өлеше буенча консультация бирелгән. Аларның 10 проценты вәкаләтле органнарна тапшырылган. Тимур Ногуманов әйтүенчә, мөрәҗәгатьләрнең 53 проценты Казан һәм Яр Чаллыга туры килә. “Узган ел белән чагыштырганда, эшмәкәрләрнең төрле сораулар белән мөрәҗәгать итү активлыгы дүрт тапкыр үсте”, - дип белдерде ул. Кама Тамагы, Алабуга, Яшел Үзән, Зәй, Әлмәт, Бөгелмә кебек муниципаль районнардан да мөрәҗәгатьләр күбрәк теркәлгән. “Казан һәм Яр Чаллыда җәмәгатьчелекне кабул итү бүлмәләрендә быел 16 эшмәкәршикаять белән мөрәҗәгать иткән, 262 язма, 25 телдән консультация уздырылган, районнарга чыгып, өч консультация үткәрелгән”, - дип билгеләп узды Тимур Ногуманов. “Безнең аппарат эшчәнлегенең уңышларына килгәндә, җинаять эшләре өлкәсендә уңышлы хәрәкәт итәбез дип әйтергә була, быел эшмәкәрләргә карата 4 җинаять эше туктатылды, бер эшмәкәр амнистияләнде, рейдерлык факты буенча җинаять эше кузгатылды. Эшмәкәрләрнең хокукларын яклау йөзеннән, аларны административ җаваплылыктан коткаруга ирешелде”, - дип ассызыклады Тимур Ногуманов. Аның сүзләренә караганда, эшкуарлар хокукларын яклау буенча вәкаләтле вәкил институты башка мәсьәләләрне хәл итүдә дә үзеннән зур өлеш кертә: законсыз конкурс нәтиҗәләрен гамәлдән чыгару, низагларны җайга салу һәм башкалар. “Киләчәктә дә без эшмәкәрләр мөрәҗәгатьләре буенча эшләү, бизнес һәм хакимият арасында багланышларны җайга салу юнәлешендә эш алып барачакбыз”, - дип белдерде Тимур Ногуманов.