Илдар Халиков: “Без Берләшкән Гарәп Әмирлекләренең тәҗрибәсен төрле өлкәләрдә өйрәнәбез”

Татарстан һәм Берләшкән Гарәп Әмирлекләренең (БГӘ) үзара инвестицион хезмәттәшлеге үсеше перспективалары турында бүген Kazansummit-2014 кысаларында узган Татарстан – Әмирлек эшлекле форумында катнашучылар фикер алыштылар. Форумда Татарстан Премьер-министры Илдар Халиков, БГӘнең икътисад министры Солтан бине Сәед әл Мансури , БГӘ эшмәкәрлек делегациясе әгъзалары катнашты.

Илдар Халиков форумда катнашучыларны Татарстан Хөкүмәте исеменнән сәламләде. “БГӘ – иң тиз үсештәге илләрнең берсе. Без сезнең тәҗрибәгезне төрле өлкәләрдә өйрәнәбез – шәһәрне планлаштыруда, МИЗ булдыруда, туристлык инфраструктурасында, һәм әлбәттә, икътисадны үстерүдә”, -дип мөрәҗәгать итте ул делегация әгъзаларына.

Хөкүмәт башлыгы кыскача республиканың икътисады турында сөйләде. БГӘдә Татарстан компанияләре эшли, алар арасында аеруча “КАМАЗ” актив эшли, узган ел Татарстан Дубайда вәкиллеген ачты, дип белдерде ул.

Илдар Халиков Казаннан Дубайга туры авиарейслар ясаучы авиакомпания җитәкчелегенә рәхмәт белдерде.

Солтан бине Сәед әл Мансури үз чиратында, Татарстан һәм БГӘнең үзара мөнәсәбәтләре югары дәрәҗәдә һәм тиз үсештә, дип белдерде. “Бүгенге форум бер-береңнең яхшырак белү өчен мөмкинлекләр бирә”, - дип саный министр.

Татарстан – Әмирлек эшлекле форумы барышында Татарстан һәм БГӘнең инвестицион хезмәттәшлеге тәкъдир ителде, катнашучылар инвестицион хезмәттәшлек перспективалары турында фикер алыштылар.