Чехия Республикасының Көньяк Моравия крае делегациясе белән очрашу

Бүген Казан Кремлендә Татарстан Президенты Рөстәм Миңнеханов Чехия Республикасының Көньяк Моравия крае делегациясе белән очрашты. Очрашуга кадәр ул Көньяк Моравия крае губернаторы Михал Гашек белән фикер алышкан иде.
Делегация 16-18 июньдә Татарстанда эш сәфәрендә. Бу Чехия Республикасы вәкилләренең җавап визиты булып тора. Искәртеп узабыз: узган елның апрелендә Татарстан делегациясе Чехиядә эш сәфәрендә булган иде.
“Без Чехиядә күргәннәрдән уңай хис-кичерешләр алган идек, сезнең Татарстанга җавап визитыгыз безне күп кенә проектлар буенча якынайтыр дип ышанам”, - дип билгеләп үтте, очрашуны ачып, Татарстан Президенты. Татарстан Чехия Республикасы белән сәүдә-икътисадый мөнәсәбәтләр, фән, мәгариф, төзелеш, инновацион мәсьәләләр һ.б. өлкәсендә хезмәттәшлек итү белән кызыксына.
“Билгеле булганча, Чехия Президенты Россиягә килергә җыена. Әгәр ул илнең төбәкләрендә булырга планлаштыра икән, Татарстан Чехия Президентын кабул итәргә әзер: без шат булачакбыз”, - диде ТР Президенты. Аның фикеренчә, ике ил арасында товар әйләнешен арттыру өчен эшне активлаштыру зарур.
Бүген Татарстан автомобиль сәнәгате, медицина, нефть химиясе, төзелеш өлкәләрендә Чехия Республикасы белән хезмәттәшлек итә, агросәнәгать комплексы өлкәсендә уртак проектлар гамәлгә куела. “Элемтәләр өчен яхшы механизм булдырылган. Барыннан да элек, Татарстанның Чехиядәге Сәүдә-икътисадый вәкиллеге бар”, - дип билгеләп үтте республика башлыгы Р.Миңнеханов.
Чехия - Татарстанның әйдәп баручы икътисадый партнерларының берсе. Бүген республика Чехия Республикасы Хөкүмәте тарафыннан рәсми расланган Россиянең 6 төбәгенең берсе санала. “Без элемтәләрне активлаштырырга тиеш. Бүген Татарстан - төрле бизнес-проектларны гамәлгә ашыру мәйданчыгы буларак җәлеп итә торган төбәк”, - дип ассызыклады Татарстан Президенты.
Михал Гашек сәламләү чыгышында, Татарстанның Чехия Республикасының Көньяк Моравия крае “традицион һәм мөһим партнеры” булачагына ышаныч белдерде. “Без төбәкләр дәрәҗәсендә мөнәсәбәтләргә үз өлешебезне кертәбез һәм хезмәттәшлекне үстерәчәкбез”, - диде ул.
Губернатор аларның төбәкләре Чехиядә фән һәм яңа эшләнмәләр өлкәсендә иң яхшыларның берсе булуы турында сөйләде. Моның белән бәйле рәвештә, ул республиканың әйдәп баручы вузларының берсендә булу һәм аларның эш юнәлешләрен өйрәнү белән кызыксынуын белдерде. Шулай ук Чехия эшмәкәрләренең республиканың эре предприятиеләре вәкилләре белән ике як өчен дә файдалы очрашулары узачагына өмет баглавын әйтте.
М.Гашек, Татарстан Президентына Чехиягә чираттагы визитында, республиканың барлык крайлары губернаторлары, шулай ук Словакиянең төбәк структуралары губернаторлары белән очрашырга тәкъдим итте. Ул Көньяк Моравия краенда курорт тармагы актив үсеш алуын билгеләп үтте һәм татарстанлыларны Чехиядә ял итәргә чакырды.
“Мин Татарстан Президентының сезнең республикага чакыруын шатланып кабул иттем. Көньяк Моравия крае Россия белән элемтәләргә бай”, - дип билгеләп үтте М.Гашек журналистларга биргән әңгәмәсендә һәм, Чехия белән Татарстан вузлары арасында тирәнтен хезмәттәшлеккә әзер, диде. “Минем белән вәкиллекле делегация килде һәм Татарстанда очрашуларда төгәл проектлар турында сөйләшү алып барачакбыз. Беренче чиратта, ул машина төзелеше тармагына кагыла", - дип ачыклык кертте.
"Безнең төбәкләрнең үсеш стратегияләре охшаш. Безнең сәнәгатьнең структура буенча аермасы бардыр, ә инновациялек, көндәшлек, яңалык, яңа базарлар – барысы буенча без охшаш”, - диде төп ММЧ вәкилләре сорауларына җавап биреп Рөстәм Миңнеханов. ТР башлыгы сүзләренә караганда, республикада чех телен өйрәнү үзәге булу мөһим, ул мөнәсәбәтләрне үстерергә ярдәм итәчәк.
“Безнең илләр – Чехия һәм Россия – алар зур, аларның куелган бурычлары да зур. Ә менә төбәкләр хезмәттәшлек итәргә тиеш, төбәкара элемтәләргә нигезләнгән мондый мөнәсәбәтләрне җайга салыну, хезмәттәшлек итүнең яхшы формасы. Безнең республика өчен бу мөһим визит һәм без, хезмәттәшләр барлык үсеш юнәлешләрен күрсен өчен, алар эшләргә теләгән структуралар белән туры элемтәгә чыга алсын өчен, барысын да эшләячәкбез”, - дип ышандырып куйды Татарстан Президенты.