Илдар Халиков парамагнит резонансын ачуга 70 ел тулуга багышланган халыкара конференциядә катнашты

Бүген Казан федераль университетының актлар залында галим Евгений Завойскийның электрон парамагнит резонансы күренешен ачуга 70 ел тулуы һәм “Магнит резонансы һәм аның кушымталарының актуаль проблемалары” XVII Халыкара яшьләр фәнни мәктәбе ачылышы уңаеннан халыкара фәнни конференция эше башланып китте.

Казанда 22 сеннән 27 нче июньгә кадәр КФУ һәм Россия Фәннәр академиясенең Е. К. Завойский исемендәге Казан физика-техник институты базасында узачак конференция һәм мәктәпнең рәсми ачылышы тантанасында Татарстан Республикасы Премьер-министры Илдар Халиков катнашты.

КФУ ректоры Илшат Гафуров, Россия фәннәр академиясе академигы, РФА Себер бүлегенең Халыкара томография үзәге директоры Ренат Сәгъдиев, ТР Фәннәр академиясе президиумы әгъзасы, РФА Казан фәнни үзәгенең Е.К.Завойский исемендәге Казан физика-техника институты директоры, профессор Кев Салихов катнашты.

Фәнни форумда дөньяның 17 иленнән 150 дән артык кеше катнаша. Бу - Мәскәү, Новосибирск, Казаннан магнит резонансы теориясе һәм аны куллану өлкәсендәге әйдәп баручы Россия белгечләре һәм Франция, Швейцария, Алмания, Япония, Голландия, Финляндия, Израиль, Грузиядән галимнәр.

“Казан университетында бик күп танылган шәхесләр эшләде, әмма академик Завойский исеме аерым урынны биләп тора. Аның тарафыннан ачылган магнит резонансы алымнары һәркайда диярлек кулланыла”, - дигән сүзләр белән ачып җибәрде КФУ ректоры Илшат Гафуров конференцияне.

Илдар Халиков юбилей датасына багышлап оештырылган фәнни форумда катнашучыларны Татарстан Президенты Рөстәм Миңнеханов һәм республика Хөкүмәте исеменнән сәламләде. Конференциягә килгән затларга, шул исәптән, Ренат Сәгъдиевны аерым билгеләп үтеп, олы рәхмәтен ирештерде.

“Ватандашларыбыз һәм университетыбыз казанышлары белән очраклы гына горурланмыйбыз. Магнит резонансы һәм аның кушымталары алымнары үсеше өлкәсендәге казанышлар төрле фәнни өлкәләрдә 13 Нобель премиясе белән билгеләп үтелгән. Магнит-резонанс томографиясе ярдәмендә элементларның күбесе, гади кешеләр тормышына кагылып, сәламәтлекне сакларга, сәнәгатьне үстерергә, илебез өчен, шулай ук башка илләр өчен дә яңа үрләр яуларга мөмкинлек бирде”, - дип белдерде Илдар Халиков. Аның әйтүенчә, парамагнит резонансы ачылышы, башка резонанс күренешләрен эзләүдә этәргеч бирде. “Бүген Казанда күп санлы эре халыкара форумнар, Дөнья һәм Ауропа чемпионатлары үткәрелә. Узган елда Универсиада узды. Татарстан башкаласы елдан-ел үзгәрә. Бүген магнит резонансы ачылышының 70 еллыгы вакыйгасында төрле илләрдән фән эшлеклеләрен, партнерларны күрү күңелгә бик хуш килә. Форумны оштыручылар сезгә Казанны күрсәтер дип ышанам. Татарстан башкаласына килүегез уңышлы эшчәнлеккә өстәмә этәргеч булыр дип уйлыйм”, - дип мөрәҗәгать итте Хөкүмәт башлыгы.

Ренат Сәгъдиев Казанның магнит резонансы башкалаларының берсе булып аталуга тулы хокукы булуын ассызыклады. “Хәзерге вакытта Казанда бу юнәлештә эре фән мәктәпләре чәчәк ата. Бик җитди нәтиҗәләр дә бар. Казанда магнит резонансы буенча күптөрле чаралар үткәрелә”, - дип ул конференциядә катнашучыларга уңышлы эшчәнлек теләде.

Кереш сүз белән шулай ук РФА Казан фәнни үзәгенең Е.К.Завойский исемендәге Казан физика-техника институты директоры, профессор Кев Салихов чыгыш ясады.

Конференциянең фәнни программасы үз эченә физика, биология, органик һәм биоорганик химия, медицина, геохимия, геологик разведка һәм башка өлкәләрдә магнит резонансы алымнары теориясе һәм заманча кушымталарының барлык бүлекләрен үз эченә ала. Конференция тәмамлангач, барлык эшләр "Applied Magnetic Resonance" журналының махсус чыгарылышында бастырылачак.

Конференция белән параллель рәвештә, “Магнит резонансы һәм аның кушымталарының актуаль проблемалары” халыкара яшьләр фәнни мәктәбе узачак. Анда катнашучылар дөньяның әйдәп баручы галимнәре докладларын тыңлап, телдән үз докладларын тәкъдим итә алачак. Яшь галимнәрнең иң яхшы докладлары премияләр белән бүләкләнәчәк.