Татарстанда елдан ел ягулык буенча рекламацияләр саны кими

12нче майдан алып тулы 1 ай эчендә Татарстан Республикасының 550 ягулык салу станциясеннән тикшерергә 1239 ягулык үрнәге алынган. Хәзерге вакытта шуларның 1114е тикшерү узган һәм 37 сенең дәүләт стандартларына туры килмәве авыкланган. Бу хакта бүген ТР Министрлар Кабинетында тикшерү нәтиҗәләренә багышланган брифингта “Ягулык ресурсларын рациональ куллану идарәсе” ДБУ җитәкчесе Роберт Гыйләҗиев сөйләде.

Тикшерелгән ягулык үрнәкләренең 27 очрагында ягулык составында күкерт (сера) матдәсе ягулык сату станцияләре җитәкчеләре тарафыннан документта күрсәтелгәннән күбрәк булуы ачыкланган. Шул исәптән 10 очракта әлеге матдә ягулык составында тиешледән артык икәне билгеле булган.

“Тикшерү барышында ”Евро-5” һәм “Евро-4” бензиннары урыннына түбәнрәк сыйфатлы, ягъни “Евро-3” ягулыгын сату очраклары ачыкланды. Дәүләт стандартларына туры килмәгән ягулык станцияләрен җентекләп тикшергәннән соң, аларның җитәкчеләренә сыйфатсыз ягулык сатулары турында мәгълүмат җиткерелде.
Шуны да әйтергә кирәк, узган ел белән чагыштырганда, сыйфатсыз ягулык сату очраклары бермә-бер кимегән. Димәк, безнең эшчәнлекнең нәтиҗәләре бар”, - дип хәбәр итте Роберт Гыйләҗиев.

Узган ел шундый ук тикшерү вакытында сыйфатсыз ягулык сатуның 58 очрагы теркәлгән булган.