Видеоконференцэлемтә режимында киңәшмә

2014 елның 5 июненә Татарстан Республикасында 1 млн. 75,6 мең кв.м торак төзеп тапшырылган (бу еллык биремнең 44,8%), узган елга караганда 103,1% тәшкил итә.

Бу хакта бүген Татарстан Республикасы Хөкүмәте йортында узган киңәшмәдә ТР төзелеш, архитектура һәм ТКХ министрының беренче урынбасары Фәрит Хәнифов хәбәр итте. Киңәшмәне барлык муниципаль районнар белән видеоконференцэлемтә режимында Татарстан Республикасы Президенты Рөстәм Миңнеханов уздырды.
Социаль ипотека программасы буенча 86,1 мең кв. метр мәйданлы 40 йорт тапшырылды (1 мең 521 фатир). Ике атнада динамика – 4 объектны тапшыру.

2014 нче елда аренда торагын төзү программасы кысаларында 52 мең 913 кв.метр мәйданлы 52 йорт төзелеше планлаштырылган. ТР Президенты каршындагы Дәүләт торак фонды программасы буенча 41 мең 492 кв.м мәйданлы 11 йорт төзелеше бара.

Фәрит Хәнифов билгеләвенчә, авария хәлендәге торакта яшәүчеләрне күчерү програмасы буенча министрлыкка 712,89 кв. метр мәйдан торакны сатып алуга 13 килешү тәкъдим ителгән. Министрлык алдында торган бурыч – быел халыкны 179 мең кв.метрлы авария хәлендәге торактан күчерү.

Быел Бөек Ватан сугышы ветераннарын торак белән тәэмин итү кысаларында 168 ветеран өчен 18 торак йорт тапшырылган. 106 ветеран өчен 32 йорт төзелеше бара.

Фәрит Хәнифов шулай ук мәктәпкәчә балалар учреждениеләрендә капиталь ремонт ясау турында сөйләде. 4 балалар бакчасында капиталь ремонт төгәлләнгән: бер объект Әлки районында һәм өч объект Чүпрәле районында.

Авыл клублары төзелеше программасына килгәндә, ул бигрәк тә Арча районының Пшәнгер авылында барган төзелешне билгеләде, һәм 2014 елның 8 июненә бу авыл клубының тантаналы ачылышы планлаштырылган.