Татарстан Президенты Лионда “Акыллы йорт” проекты белән танышты

2014 елның 23-25 июннәрендә Татарстан Республикасы Президенты Рөстәм Миңнеханов җитәкчелегендәге Татарстан Республикасы делегациясе эш визиты белән Франциядә булды.
Pegas (аэрокосмос юнәлеше), Eurobiomed (биомедицина), SCS (Secured Communicating Solutions) һәм Optitec (мәгълүмат технологияләре) француз сәнәгать кластерлары вәкилләре белән бүген Татарстан Республикасы Президенты Рөстәм Миңнеханов Ниццада очрашты.
Рөстәм Миңнеханов һәм Татарстан Республикасы делегациясенә кластерлар эшчәнлеге турында презентация әзерләнгән иде.
Pegas (Пегас) икътисадый кластеры Франциянең аэрокосмос сәнәгатенең үзәге булып тора, 350 катнашучысы бар – яңа предприятиеләрдән эре берлекләр, тикшеренү үзәкләре, икътисадый һәм дәүләт партнерлыкларына хәтле.Кластер 2005 елда булдырылган. Пегас кластерында 18 мең белгеч эшли, шул исәптән 1700 тикшеренүче. Сәнәгать производствосы күләме буенча аэрокосмос кластеры Прованс-Альп-Лазур яр регионында беренче урынны били. Прованс-Альп регионының фәнни-тикшеренү эшләренең өчтән бере Пегас кластерына туры килә.
Eurobiomed биомедицина кластеры 2009 елда барлыкка килгән, сәламәтлек саклау өлкәсендә 400дән артык компанияне берләштерә. Әлеге кластер территориясендә күп санлы стартаплар һәм фармацевтика компанияләре урнашкан. Бу сәламәтлек саклау өлкәсендә Франциядә зурлыгы буенча икенче кластер.
SCS (Secured Communicating Solutions) кластеры Лазур ярда урнашкан һәм 250дән артык әгъзаны берләштерә; 75 %ын кече һәм урта бизнес предпритиеләре тәшкил итә. SCS кластеры микроэлектроника, телеэлемтәләр, программа тәэмин ителеше өлкәсендә эш итә. SCS кластеры предприятиеләре шулай ук “акыллы” хәл ителешләрдә специальләшә: контактсыз технология, мобиль сервислар, машинаара элемтә, иминлек.
Optitec кластеры эшчәнлегенең юнәлеше оптика һәм визуальләштерү өлкәсендә, шул исәптән космос киңлегендә, астрофизика өлкәсендә, атом-төш сәнәгате өчен оптика һәм фотоника. Кластер Германия, Бөек Британия, Италия, Испания, Канада, Бразилия, Төньяк Африка фәнни-тикшеренү институтлары белән хезмәттәшлек итә.