Эшмәкәрләргә дә уңайлы мохит булырмы?

Татарстанда эшмәкәрлек климатын күзәтү астына алалар. Ай саен республикабызда бизнес үсешенә комачаулаучы сәбәпләр ачыкланачак. Малтабарларны борчыган мәсьәләләрне 4 канал ярдәмендә туплап, аларга тирәнтен анализ ясарга ниятлиләр.

Бүгенге көндә Татарстанда 140 меңгә якын кече һәм урта эшмәкәрлек субъекты теркәлгән. Соңгы өч елда кече һәм урта предприятиеләр саны 19 процентка арткан. Әмма шәхси эшмәкәрләр исәбендә, киресенчә, кимү тенденциясе күзәтелә. Бу өлкәдә югалтулар 30 процент дәрәҗәсендә дип исәпләнгән. Һәм малтабарлар бизнестан “качуын” дәвам итә. Үткәрелгән сораштырулардан күренгәнчә, алар эшмәкәрлектән читләшүен иминият кертемнәре артуы, эшчәнлекнең түбән рентабельлеге, җитештергән продукцияне сату белән булган проблемалар һәм аренда бәясе кыйммәт булу белән аңлата.

Хәзерге вакытта республикабызда кече һәм урта бизнес өлкәсендә 480 мең кеше хезмәт куя. Тулаем алганда, икътисадта кече һәм урта эшмәкәрлек өлеше 25,6 процент тәшкил итә. Бу күрсәткеч 2010 елдан бирле үзгәрешсез калган диярлек. Татарстан икътисад министры урынбасары – Эшмәкәрлеккә ярдәм итү департаменты башлыгы Рөстәм Сибгатуллин сүзләренчә, Татарстанда эшмәкәрлек белән бәйле вәзгыяте бер дә канәгатьләнерлек түгел. Үсеш алган илләрдә кече һәм урта бизнес өлеше 40-70 процент дәрәҗәсендә бит.

Җитәкчеләр эшмәкәрлек өлкәсендә “авырткан” нокталарны ачыклау кече һәм урта эшмәкәрлек үсешенә ярдәм итәр дип өметләнә. Быелның март аенда Татарстан Президенты Рөстәм Миңнеханов катнашында Татарстан Министрлар кабинеты каршындагы Икътисади совет утырышы узды. Шул вакытта 2014-2016 елларда бизнеска кулай шартлар тудыру буенча күреләчәк чаралар планын үз эченә алган “Юл картасы” расланды. Икътисад министрлыгы тарафыннан уйлап табылган республикабыздагы бизнес-климатны мониторинглау системасы билгеләнгән мәсьәләләрне кәгазьдә генә калдырмауны да күзәтеп торачак. Эшмәкәрләрдән килеп ирешкән хәбәрләр бу эшчәнлектә зур ярдәм булыр дип саныйлар.

Рөстәм Сибгатуллин хәбәр иткәнчә, бизнес-климатны өйрәнү 4 канал буенча алып барылачак. Шуларның өчесе - “кайнар линия”, “Халык контроле” системасы һәм Икътисад министрлыгы сайтындагы сораштыру - бүген тулы куәттә эшли инде. Дүртенче канал – сораштыруларга аеруча зур өмет баглыйлар. Телефон аша эшмәкәрләргә бер төркем сораулар биреләчәк. Шул рәвешле Татарстан эшмәкәрлек мохите буенча тулы картина барлыкка килер дип уйланыла.

Бердәм мониторинг системасы ярдәмендә тупланган мәгълүмат ай саен республика җитәкчелегенә җиткереләчәк. Шуның нәтиҗәсе буенча даими рәвештә актив эшчәнлек алып барылыр дип планлаштырыла. Төп максат - шәхси проблемаларны ачыклау ярдәмендә тулаем мохитне күзаллау һәм вакытында чаралар күрү. Кабул ителгән “Юл картасы” буенча киләсе елда кече һәм урта эшмәкәрлекнең икътисадтагы өлешен 34 процентка җиткерәсе бар бит.