Россия Финанс күзәтчелеге җитәкчесе һәм РФ Федераль казначейлык җитәкчесе белән очрашу

Бүген ТР Премьер-министры Илдар Халиков РФ Финанс-бюджет күзәтчелеге җитәкчесе Александр Смирнов һәм РФ Федераль казначейлык җитәкчесе Роман Артюхин белән очрашты. ТР Хөкүмәте йортында узган очрашуда шулай ук Федераль финанс-бюджет күзәтчелеге хезмәтенең ТРда территориаль идарәсе җитәкчесе Әминә Хөсәенова, Федераль казначейлыкның ТР буенча идарәсе җитәкчесе Рөстәм Нуриәхмәтов һәм ТР Министрлар Кабинеты Аппаратының икътисад, финанслар һәм дәүләт милке белән идарә башлыгы урынбасары Ирек Зарипов катнашты.

Очрашу барышында ике яктан да катнашучылар республикада финанс күзәтчелегенә караган мәсьәләләр турында фикер алыштылар. Казанда Федераль финанс-бюджет күзәтчелеге хезмәтенең 10 елллыгына багышланган халыкара фәнни-гамәли конференция уздыру шулай ук фикер алышуның темасы булды.

Искә төшерәбез, 2014 елның 22-23 маенда Казан (Идел буе) Федераль университетында “Россия Федерациясендә дәүләт (муниципаль) финанс күзәтчелеге. Теория, практика, үсеш перспективалары” дип аталган халыкара фәнни-гамәли конференция узачак. Конференцияне оештыручылар – Казан федераль университеты һәм Федераль финанс-бюджет күзәтчелек хезмәте. Бу чараның максаты – фәнни нәтиҗәләр, тикшеренү һәм гамәли тәҗрибә белән уртаклашу. Конференция Казан университетының 210 еллыгына һәм Федераль финанс-бюджет күзәтчелеге хезмәтенең 10 еллыгына багышлана.