Төркмәнстан “Алабуга” МИЗ территориясендә текстиль производствосын ачарга тели

ТР Президенты Рөстәм Миңнеханов җитәкчелегендәге республика делегациясе эш сәфәре белән 26-27 апрель көннәрендә Төркмәнстанда булды. Җавап визиты белән агымдагы елның өченче кварталында Төркмәнстан делегациясенең Казанга килүе көтелә. Бу хакта бүген ТР Министрлар Кабинетында Төркмәнстанга эш сәфәре нәтиҗәләренә багышланган брифингта ТР вице-премьеры – ТР сәнәгать һәм сәүдә министры Равил Зарипов хәбәр итте.

Министр сәфәр барышында сәнәгать, туризм һәм мәдәният юнәлешләре буенча хезмәттәшлек мәсьәләләре турында сөйләшү булганлыгын билгеләп узды. Сәнәгатькә килгәндә, агымдагы елның сентябрь аенда Казанда Татарстан-Төркмәнстан эшче төркеменең сәүдә-икътисад, фәнни-техник һәм мәдәни хезмәттәшлек буенча икенче утырышын уздыру ниятләнә.

Равил Зарипов әйтүенчә, Төркмәнстанда “КАМАЗ” ААҖ нең даими гамәлдә торучы офисы бар, аның сүзләреннән аңлашылганча, Төркмәнстанның халык хуҗалыгы өчен берничә "КамАЗ" автомобиле һәм махсус техника сатып алу эшенә әзерлек бара. Министр Татарстан һәм Төркмәнстан хезмәттәшлегенең аеруча перспективалы юнәлешләрен билгеләп үтте. Алар арасында зур йөк машиналары базасында махсус техниканы җиһазлау буенча “КАМАЗ” заводы проектлары, шулай ук пассажир транспортын газ-мотор ягулыгы системалары белән тәэмин итү кебек юнәлешләр бар.

2013 нче елда Татарстан һәм Төркмәнстан арасында тышкы сәүдә әйләнеше 42 млн доллар тирәсе тәшкил иткән, аларның 33 млн долларга якыны – экспорт һәм 9 миллионнан артыгы импортка карый.

Төркмәнстанлылар үз илләрен “КАМАЗ”, “Татнефть”, “Түбән Кама нефтехтим” ААҖ, “Казан вертолет заводы” ААҖ һәм республиканың башка предприятиеләре продукциясе һәм хезмәтләре белән тәэмин итү буенча хезмәттәшлекне киңәйтү белән кызыксына.

Равил Зарипов ассызыклаганча, үзара хезмәттәшлек юнәлешләре исемлегендә мәдәни-гуманитар багланышлар да өстенлекле урынны биләп тора. Казан илкүләм тикшеренү-технологик университеты чит ил студентлары белән актив эш алып бара, бүгенге көндә бу югары уку йортында Төркмәнстаннан 200 ләп студент белем ала. Гомумән, республика күләмендә Төркмәнстаннан 900 дән артык студент укый. “Без студентлар белән генә түгел, мөгалимнәр белән дә үзара алмашны гамәлгә ашырырга кирәк дигән карарга килдек”, - дип белдерде Равил Зарипов.

Министр билгеләп үткәнчә, Төркмәнстанда текстиль эшләнмәләр, киҗе-мамык тукымалардан олылар, балалар киеме тегү эшенә зур игътибар бирелә. “Бу нисбәттән, алар Татарстанда “Алабуга” махсус икътисади зона территориясендә текстиль продукция эшләп чыгару производствосын оештыру тәкъдимен җиткерде. Без исә бу фикерне хупладык”, - диде Равил Зарипов. Татарстан делегациясе әгъзаларына әлеге фикер белән Төркмәнстанның тышкы эшләр министры Рәшит Мередов мөрәҗәгать иткән.

Министр, делегациянең сәфәр барышында эшлекле сөйләшүләреннән тыш, төркмән чабышкысы бәйрәменә багышланган чараларда катнашуын искәртте.

Визит кысаларында Татарстан һәм Төркмәнстан арасында ике яклы документлар имзаланган: Әлмәт һәм Балканабад шәһәрләре арасында җан дуслык, дустанә мөнәсәбәтләрне ныгыту һәм хезмәттәшлек итү турында килешү; ТР һәм Төркмәнстан Сәүдә-сәнәгать палаталары арасында хезмәттәшлек турындагы килешү рәсмиләштерелгән.