Рөстәм Миңнеханов Мәскәүдә РФ Президенты каршындагы Комиссия утырышында катнашты

Кичә Татарстан Республикасы Президенты Мәскәүдә РФ Президенты каршындагы социаль-икътисади үсешнең максатчан күрсәткечләренә ирешү мониторингы буенча комиссия утырышында катнашты. Россия Федерациясе Президенты Владимир Путин үткәргән утырышта нәкъ бер ел элек имзаланган май указларын гамәлгә кую буенча фикер алыштылар.
Утырышта РФ Премьер-министры Дмитрий Медведев, Хөкүмәт әгъзалары, төбәк башлыклары катнашты, дип хәбәр итә ТР Президенты матбугат хезмәте.
Владимир Путин утырышны ачып, май указлары гражданнарның иң мөһим проблемаларын үз эченә алган, һәм аларның уңышлы хәл ителеше миллионлаган кешенең яшәү перспективасын билгели, дип белдерде. Указларда бюджет өлкәсендә эшләүчеләрнең хезмәт хакын арттыру, шул ук вакытта медицина, белем бирү, социаль хезмәтләр сыйфатын күтәрү, гражданнарның, шул исәптән авария хәлендәге йортта яшәүче күп балалы гаиләләрнең дә торак шартларын яхшырту, муниципаль һәм дәүләт хезмәтләре күрсәтүче хакимият органнарының һәм оешмаларның эшчәнлеген яхшырту, киләчәк үсеш һәм икътисад үсешенең башлангыч факторы буларак хезмәт җитештерүчәнлеген арттыру каралган.
“Соңгы вакытта икътисади үсеш темплары акрынайды, әмма бу өстенлекләрне үзгәртү өчен сәбәп түгел, ә, киресенчә, аларга тагын да игътибарлырак карарга һәм бурычларны төгәл билгеләү зарур”, - диде В.Путин.
Соңгы 20 елда Россия беренче тапкыр халыкның табигый артуына иреште. Россиядә беренче тапкыр гомер озынлыгы 71 яшь чамасы тәшкил итте.
“Социаль хезмәтләр сыйфатының сәламәтлек саклау, мәгариф, фән өлкәсендә эшләүче кешеләрдән торганын беләбез һәм шуңа күрә бу категориягә керүче гражданнарның хезмәт хакын күтәрүне планлаштырдык. 2013 елда куелган күрсәткечләргә якынайдык”, - диде Владимир Путин.
Шулай итеп, илдә табиблар 42 мең сумнан артык хезмәт хакы ала башлады, вуз укытучылары – 40тан артык, фәнни хезмәткәрләр – 41дән артык, укытучылар -29 мең сумнан. Якындагы елларда урта медперсонал һәм мәдәният хезмәткәрләре хезмәт хакы да бу дәрәҗәгә якынаячак.
Демография өлкәсендә уңай тенденцияләрне ныгыту һәм кискен социаль проблемаларның берсен хәл итү өчен, балалар бакчаларында чиратларны бетерү планлаштырылган. Ике елда 3 яшьтән 7 яшькәчә балалар өчен өстәмә 670 мең урын булдырылган. Агымдагы елда Хөкүмәт тарафыннан федераль бюджеттан бу максатларга 50 млрд. сум акча бүлеп бирелгән, ә ике елда барлыгы – 100 млрд. сум. Бер елдан программа ябыла.
Указларда билгеләнгән тагын бер мөһим юнәлешләрнең берсе – гражданнарның торак шартларын яхшырту. Авария хәлендәге йортларда яшәүче кешеләрне күчерү буенча эш бара. Быел 2,8 млн. кв. метр шундый йортларны сүтү планлаштырыла, ә 2017 елның 1 сентябренә кадәр барлыгы 11 млн кв. метрдан артык, шул исәптән 10 млн. кв. метрдан артыгы – ТРК ярдәм фонды катнашында.
В.Путин фикеренчә, гражданнарга муниципаль һәм дәүләт хезмәтләре, шулай ук “бер тәрәзә” принцибы буенча күп функцияле үзәкләр күрсәтә торган хезмәтләр сыйфатын бәяләү мөмкинлеге бирүче система булдыру мөһим бурыч булып тора.
Вице-премьер – Россия Хөкүмәте Аппараты җитәкчесе Сергей Приходько белдергәнчә, 2014 елда май указларын гамәлгә ашыру өчен 600 млрд. сум чамасы акча юнәлдерү планлаштырыла, ә киләсе 2 елда финанслау күләмнәре тагын да югары булачак.
Шулай ук социаль сәясәт чараларын финанслау 1,6 тапкыр артачак: 2014 елда 205 млрд. сум булса, 2016 елда – 325 млрд. сум.
“2014-2016 елларга исәпләнгән федераль бюджет турындагы законда гомуми сумма 2 трлн. сумнан артып китә. Бу акчаның яртысыннан артыгы тормыш сыйфатына, социаль һәм демографик вәзгыятькә йогынты ясаучы май указларын гамәлгә куюга юнәлдереләчәк”, - диде Приходько.