Татарстан Республикасы һәм Шарҗ әмирлеге Сәүдә-сәнәгать палаталары арасында хезмәттәшлек турында килешү имзаланды

Бүген, Дубайда ел саен уздырыла торган AIM инвестиция форумы алдыннан, Татарстан Республикасы делегациясе Шарҗ әмирлеге сәүдә-сәнәгать палатасы рәисе Әхмәд Мөхәммәд әл Мидф белән беренче очрашуын уздырды. ТР делегациясе составында ТР Президенты ярдәмчесе Радик Гыйматдинов, Татарстан Республикасының БГӘдәге сәүдә-икътисад вәкиле Тимур Хәйретдинов, “Иннополис” махсус икътисади зонасы” ААҖ генераль директоры Игорь Носов һәм ТР Сәүдә-сәнәгать палатасы идарәсе рәисе Шамил Агеев бар, дип хәбәр итә ТР Президенты матбугат хезмәте.

Очрашу барышында Татарстан делегациясе өчен Шарҗ әмирлегенең икътисади һәм инвестиция потенциалын тәкъдир иттеләр, һәм шулай ук Сәүдә-сәнәгать палатасының эшчәнлеге һәм өстенлекле юнәлешләре үсеше турында сөйләделәр. Шарҗда егермеләп сәнәгать зонасы булдырылган. Монда нигездә химия сәнәгатенең урта һәм кече предприятиеләре тупланган һәм ирекле икътисади сәүдә зонасы оештырылган.

Игорь Носов Татарстанда IT-индустрия үсеше һәм “Иннополис” проекты турында сөйләде.

Үз чиратында, Әхмәд Мөхәммәд Әл Мидф төбәкләр белән, аеруча Татарстан Республикасы белән хезмәттәшлеккә зур кызыксыну белдерде. “Татарстан Республикасы делегациясенең килүе, һичшиксез, Россия-Әмирлек багланышларының үсешенә ярдәм итәчәк”, диде ул.

Очрашу нәтиҗәләре буенча Татарстан Республикасы һәм Шарҗ әмирлеге Сәүдә-сәнәгать палаталары арасында хезмәттәшлек турында килешү имзаланды.