Эшмәкәрләр тикшерүчеләр “игътибары”ннан интегә

Эшмәкәрләргә әле дә тыныч кына эшләргә ирек бирмиләр. Тикшерүләрне өч елга бер тапкыр гына алдан хәбәр итеп үткәрергә ярый дигән канун кабул ителгәч тә, эшләр җайланмаган. Планнан тыш тикшерүләр ниндидер шикаять кабул ителеп, прокуратурадан рөхсәт алынып кына үткәрелергә тиеш диелсә дә, конрольдә тотучы органнар канунны читләтеп үтәргә өйрәнгән.

Тикшерүләр, административ киртәләр, салым сәясәте – эшкуарларның төп зарлары әле дә шулар белән бәйле. Бизнес-омбудсменга килгән мөрәҗәгатьләр, җәмәгать оешмалары, малтабарларның үзләреннән алынган мәгълүматларны анализлаганнан соң ясалган нәтиҗәләр бу.

Татарстан президенты каршындагы Эшкуарларның хокукларын яклау буенча вәкил Тимур Ногманов сүзләренчә, 2013 елда бизнесменнардан 201 мөрәҗәгать килеп ирешкән, телдән – 76, язма рәвештә 125 мөрәҗәгать теркәлгән. Алар, нигездә, җир һәм милек мөнәсәбәтләре, авыл хуҗалыгы, җинаять җаваплылыгына тарту, тикшерүләр үткәрү мәсьәләләре буенча шикаять итә икән.

Бизнес-омбудсменны исә тикшерү органнарының эшчәнлеге аеруча борчуга салган. Татарстан Прокуратурасы мәгълүматларына караганда, 2013 елда гына да алар тарафыннан 49 меңгә якын тикшерү үткәрелгән. Шуларның 30 меңе – планнан тыш. Шул ук вакытта тикшерүләрнең бу төре, нигездә, Прокуратура белән килешенмәгән булган.

- Федераль канунда билгеләнгән эш тәртибен бозып, алар эшмәкәрләрне бернинди килешүләрсез тикшергән, - дип сөйләде Тимур Ногманов.

Шулай, “Эссен” сәүдә компаниясенә узган елда тикшерүчеләр 368 тапкыр килгән. Ел әйләнәсендә 300 эш көне булуын исәпкә алсаң, компаниядә көненә 1-2 тикшерү үткәрелгән булып чыга. Компания бу мәсьәләләрне җайга салу өчен хәтта махсус юристлар штаты тотарга мәҗбүр икән.

Шул ук вакытта тикшерү органнары эшчәнлегенең нәтиҗәсе дә әллә ни югары түгел. Узган елда үткәрелгән 49 мең тикшерүдән соң җинаять эше кузгатуга бары 7 материал туплап җибәрелгән. Һәм шуларның берсе буенча гына эш кузгатылган.